Afmæliskveðja: Óskar Ólason yfirlögregluþjónn Í dag, 7. nóvember 1986, verður Óskar Ólason, yfirlögregluþjónn í Reykjavík, 70 ára. Þeim er til þekkja finnst þetta með ólíkindum enda maðurinn vel á sig kominn og unglegur og fullgildur starfsmaður. Ég tek því undir þá umræðu sem nú er í gangi að endurskoða þurfi ákvæði um starfslok opinberrastarfsmanna og ekki verði eingöngu miðað við aldur heldur einnig tekið tillit til andlegs og líkamlegs ástands manna þegar slík tímamót nálgast. Íslenskt þjóðfélag hefurekki efni á að leggja til hliðar starfsmenn með fullt starfsþrek og ómetanlega starfsreynslu eingöngu vegna þess að þeir hafi náð vissum aldri. Þetta er ein af mörgum eft iröpunum sem við höfum tekið uppeftir þjóðum sem búa við mikið at vinnuleysi og tugir og hundruð manna bíða eftir hverju starfi sem losnar. Sem betur fer eigum viðekki við þennan vanda að stríða, því við þurfum að nýta hverja vinnandi hönd sem fús er til starfa.

Því miður verður þessu ekki komið við með þig, Óskar minn, og því vildi ég nota þetta tækifæri til að óska þér til hamingju með daginn og langa framtíð. Þú átt orðið langan og farsælan starfsferil að baki eða frá 1. apríl 1943 er þú hófst störf í lögreglunni í Reykjavík í miðri síðari heimsstyrjöldinni. Það veit ég að voru erfið ár en þú og þínir starfsfélagar leystuð þau störf vel af hendi. Í starfi þínu hefur þú notið trausts þinna yfirmanna og verið falin mörg trúnaðar- og ábyrgðarstörf. Umferðarmálin hafaþó öðru fremur orðið þinn starfsvettvangur allt frá því þú fórst til rannsóknarlögreglunnar í rannsóknir umferðarslysa. Árið 1963 er þú varðst aðalvarðstjóri við lögreglustjóraembættið um líkt leyti og við Guðmundur Hermannsson hófust okkar nánu kynni og samstarf sem nú hefur staðið í aldarfjórðung. Árið 1966 þegar þú ert skipaður yfirlögregluþjónn umferðarmála verður mikil breyting á skipulagi umferðarlöggæslunnar og annasamur tími fór í hönd við undirbúning og síðan breytinguna í hægri umferð 1968. Þar fékkst þú þína eldskírn ásamt mörgum öðrum en ég held að 26. maí 1968 þegar hægri umferð tók gildi verði sá dagur sem markað hefur dýpst spor í íslensk umferðarmál. Á starfsferli þínum hefur þú með þrotlausu starfi þínu að umferðaröryggismálum unnið ómetanlegt starf og öðlast mikla reynslu og fengið mikla yfirsýn yfir þessi mál, og reynst ráðhollur og átt þátt í að bæta úr ýmsu er miður hefur farið. Það verður því skarð fyrir skildi er þú nú lætur af starfi. Á starfsferli þínum hefur þú með kennslu í Lögregluskólanum, á námskeiðum fyrir bifreiðastjóra og á ýmsan annan hátt unnið að bættri umferðarfræðslu og með setu í umferðarnefnd og Umferðarráði komið ýmsu góðu til leiðar með þekkingu þinni og reynslu í þessum málum. Viðsem starfað höfum með þér í lögreglunni í Reykjavík viljum á þessum degi þakka þér langt og ánægjulegt samstarf og færa þér og þínum hugheilar hamingjuóskir.

Heill þér sjötugum.

Bjarki Elíasson

Óskar og kona hans, Ásta Einarsdóttir, ætla að taka á móti gestum sínum í dag í Iðnaðarmannahúsinu við Hallveigarstíg milli kl. 17 og 19.