Framleiðendur: Danny DeVito, Michael Shamberg, Stacey Sher. Leikstjóri: Andrew Niccol. Handritshöfundar: Andrew Niccol. Kvikmyndataka: Slavomir Idziak. Tónlist: Michael Nyman. Aðalhlutverk: Ethan Hawke, Uma Thurman, Gore Vidal, Xander Berkeley, Elias Koteas, Jude Law, Ernest Borgnine. 106 mín. Bandaríkin. Háskólabíó 1998. Myndin er öllum leyfð.
Stórkostleg vísindaskáldsaga Gattaka (Gattaca) Drama Framleiðendur: Danny DeVito, Michael Shamberg, Stacey Sher. Leikstjóri: Andrew Niccol. Handritshöfundar: Andrew Niccol. Kvikmyndataka: Slavomir Idziak. Tónlist: Michael Nyman. Aðalhlutverk: Ethan Hawke, Uma Thurman, Gore Vidal, Xander Berkeley, Elias Koteas, Jude Law, Ernest Borgnine. 106 mín. Bandaríkin. Háskólabíó 1998. Myndin er öllum leyfð. Í FRAMTÍÐINNI hefur samfélagið þróast þannig að DNA-sýni úr fólki er tekið við fæðingu, sem sýnir fram á hættu á sjúkdómum og geðrænum truflunum og ákvarðar það hvernig fólki mun vegna í lífinu. Vincent er einn af þeim sem hefur verið getinn með gömlu hefðbundnu aðferðinni, þ.e. kynmökum, og fæðist hann með hjartakvilla sem veldur því að draumur hans um að komast út í geiminn er fjarlægur. En það er hægt að kaupa allt í þessum heimi og Vincent kaupir sér nýtt líf með því að þykjast vera allt önnur persóna en hann er, en sú persóna hefur alla þá kosti að bera til að komast út í geim. Í mörg ár hafa vísindaskáldsögur lagt mun meiri áherslu á tæknibrellur heldur en hinn mannlega þátt, sem hefur orðið til þess að innihald myndanna hefur dvínað á meðan yfirborðið hefur orðið aðalatriðið. "Contact" gerði heiðarlega tilraun að snúa við blaðinu og tókst prýðilega ætlunarverk sitt, en það er þessi mynd Gattaka sem er fyrsta meistaraverk vísindaskáldsögumynda á þessum áratugi. Þetta er framtíðarsýn í líkingu við 1984 eftir George Orwell, en bendir auk þess á málefni sem mjög er umtalað þessa dagana, þ.e. erfðarvísindi. Allt virðiðst fullkomið á yfirborðinu og kynþáttafordómar virðast ekki vera til staðar lengur, en í staðin er komin mismunun sem kemur strax fram við fæðingu. Aðalpersóna myndarinnar, Vincent, hefur alla sína tíð búið við þessa mismunun og hefur hálfpartinn sætt sig við hana en það sem fær hann til þess að berjast gegn henni er draumur hans. Allir leikararnir standa sig frábærlega og skemmtilegt er að sjá rithöfundinn Gore Vidal í hlutverki yfirmanns Vincents. Ethan Hawke er hæfileikaríkur leikari og gerir persónu Vincents góð skil og Thurman er traust sem samstarsfélagi Hawkes, sem eins og flestir hefur verið búin til á tilraunastofu. Bestu senurnar í myndinni eru á milli hins "fullkomna" Jude Law og Ethan Hawke, en þær senur eru óaðfinnanlega leiknar og togstreytan á milli persónanna kemur virkilega vel fram. Eini gallinn við myndina er að samband Vincents við bróður sinn er svolítið þvingað og verður aldrei nægilega sannfærandi, en það eru smámunir. Myndataka Slavomir Idziaks er stórkostleg og litanotkunin er einstaklega vel heppnuð. Tónlist Michael Nymans er frábær og hefur hann ekki gert svona góða hluti síðan "The Piano". Heiðurinn á þessu öllu saman á Andrew Niccol, en þetta er fyrsta kvikmynd hans og skrifar hann einnig hið stórkostlega handrit. Það er óskandi að þessi mynd muni fá uppreisn æru á myndbandamarkaðnum fyrst hún komst ekki í kvikmyndahús hér á landi. Ottó Geir Borg