Hinn heimsfrægi þýski tónlistarhópur Musica Antiqua Köln, sem nú er á tónleikaferð um Eystrasaltslöndin og Norður- Evrópu, heldur tónleika í Langholtskirkju á morgun, sunnudag, kl. 17. MARGRÉT SVEINBJÖRNSDÓTTIR náði símasambandi við Reinhard Goebel, stofnanda og stjórnanda hópsins, í fyrradag, þegar hann var nýlentur á Grænlandi.
MUSICA ANTIQUA FRÁ KÖLN Í LANGHOLTSKIRKJU Á MORGUN "GÆTI SPILAÐ Á TÓNLEIKUM

Á HVERJUM EINASTA DEGI"

Hinn heimsfrægi þýski tónlistarhópur Musica Antiqua Köln, sem nú er á tónleikaferð um Eystrasaltslöndin og Norður- Evrópu, heldur tónleika í Langholtskirkju á morgun, sunnudag, kl. 17. MARGRÉT SVEINBJÖRNSDÓTTIR náði símasambandi við Reinhard Goebel, stofnanda og stjórnanda hópsins, í fyrradag, þegar hann var nýlentur á Grænlandi.

YFIRSKRIFT tónleikaferðalagsins er "Musica Baltica" en fyrstu tónleikarnir voru í Ósló 28. apríl síðastliðinn. Þaðan var haldið til Gautaborgar, þá til Stokkhólms, Helsinki, St. Pétursborgar, Tartu, Tallinn, Riga, Danzig, Varsjár, Vilnius, Nuuk, og á morgun er röðin komin að Reykjavík. Héðan heldur hópurinn til Þórshafnar í Færeyjum og síðustu tónleikarnir verða í Danmörku; í Louisiana-safninu og Sankti Péturskirkjunni í Kaupmannahöfn í lok næstu viku.

Á efnisskrá tónleikaferðarinnar eru verk eftir helstu barokktónskáld Eystrasaltssvæðisins; Vincenco Albrici, Dietrich Becker, Thomas Baltzer, Andreas Kirchoff, Johann Valentin Meder, Johann Fischer og Georg Philipp Telemann.

Lifandi og afburðasnjöll túlkun á tónlist 17. og 18. aldar

Stofnandi Musica Antiqua og stjórnandi allt frá upphafi er fiðluleikarinn Reinhard Goebel. Hann var 21 árs gamall þegar hann stofnaði Musica Antiqua ásamt nokkrum félögum sínum úr Tónlistarháskólanum í Köln árið 1973 og á þeim rúma aldarfjórðungi sem liðinn er síðan hefur hópurinn leikið á ótal tónleikum um allan heim og hljóðritað mikið af verkum helstu tónskálda 17. og 18. aldar. Á þeim tíma hafa orðið nokkur mannaskipti í hópnum og nú kveðst Goebel vera sá eini sem eftir er af þeim hópi sem upphaflega myndaði Musica Antica. Allt frá árinu 1978 hafa Musica Antiqua og Goebel verið á samningi við hljómplötuútgáfuna Deutsche Grammophone, sem hefur gefið út fjölda geisladiska hópsins í röðinni Archiv Produktion. Í fréttatilkynningu segir að litið sé á flutning hópsins sem "nánast fullkomið dæmi um lifandi og afburðasnjalla túlkun á tónlist 17. og 18. aldar svo og um frjóa og hugmyndaríka notkun á hljóðfærum þess tíma sem verkin voru samin á."

Musica Antica leikur barokktónlist á barokkhljóðfæri. En skyldi túlkunin vera sú sama og á þeim tíma sem tónlistin var samin? Goebel segir erfitt að svara því, en auðvitað reyni hann að vera trúr tónlistinni og verkunum. Á hinn bóginn verði menn að gæta þess að sökkva sér ekki svo djúpt í frumheimildirnar að sjálf músíkin gleymist.

Gerir bæði áheyrendur og

flytjendur hamingjusama

Musica Antiqua leikur að jafnaði á 120 tónleikum á ári, eða 10 tónleika í hverjum mánuði. Þegar blaðamaður gefur til kynna að honum þyki það allmikið, ekki síst í ljósi þess að hópurinn hefur einnig verið ötull við upptökur á geisladiskum, segir Goebel: "Sjáðu til, annað fólk mætir í vinnuna á hverjum degi. Og ekki er þetta líkamlega erfitt, ekki erum við að lyfta þungum steinum, við leikum á létt hljóðfæri. Gott og vel, það getur verið erfitt, en oftast nær eru tónleikarnir ekki mikið lengri en tveir klukkutímar. Og þetta er iðja sem gerir bæði áheyrendur og flytjendur hamingjusama ­ svo ég gæti spilað á tónleikum á hverjum einasta degi," segir hann og hlær.

Aðspurður hvort hann eigi sér einhvern uppáhaldstónleikastað eða uppáhaldsáheyrendahóp segir hann það fara mjög mikið eftir þeim verkum sem spiluð eru hverju sinni. Hann nefnir sem dæmi efnisskrá tónleikaferðarinnar um Eystrasaltslöndin og Norður-Evrópu, þar sem hópurinn leikur verk eftir tónskáld af Eystrasaltssvæðinu. "Það myndi enginn hafa áhuga á þessu prógrammi í New York, svo dæmi sé nefnt. Tengslin milli áheyrenda og efnisskrár eru nefnilega afar sérstök. Það er t.d. ekki ráðlegt að spila Bach-kantötu á Ítalíu því fólk þar skilur þá tónlist hreinlega ekki," segir hann.

"Eldri tónlist þarfnast þessara

nánu tengsla við söguna"

"Vissulega eru staðir þar sem er yndislegt að spila, eins og Amsterdam, Kaupmannahöfn og Stokkhólmur, þar sem sagan er enn lifandi. Aftur á móti er það allt öðruvísi á stöðum eins og Detroit eða Toronto. Eldri tónlist þarfnast þessara nánu tengsla við söguna. Sinfóníur Beethovens hljóma nú einu sinni langbest í Vín. Rétt eins og fiskur bragðast örugglega best á Íslandi og það ætti alls ekki að fara með hann til Parma á Ítalíu," heldur hann áfram.

Á morgun ætti Goebel að fá tækifæri til að sannreyna bragðgæði íslensks fiskmetis en þetta er í fyrsta sinn sem hópurinn kemur hingað til lands. "Það tók okkur hvorki meira né minna en 26 ár að komast til Íslands," segir hann að síðustu og kveðst hlakka mikið til.

Tónleikarnir í Langholtskirkju hefjast kl. 17 á morgun, sunnudag, og er forsala aðgöngumiða hjá Goethe-Zentrum, Máli og menningu og 12 tónum.



Ljósmynd/Susesch Bayat MUSICA Antiqua, Köln.

STOFNANDI hópsins og stjórnandi, Reinhard Goebel.