Bellatrix er með kveðjutónleika á Gauki á Stöng í kvöld en þar koma einnig fram sveitirnar Botnleðja og Dan Modan. Dóra Ósk Halldórsdóttir hitti kærustuparið Elízu í Bellatrix og Heiðar í Botnleðju og forvitnaðist um sambandið og framtíðina.
Kærustuparið Elíza og Heiðar Elta drauma sína og mætast á miðri leið

Bellatrix er með kveðjutónleika á Gauki á Stöng í kvöld en þar koma einnig fram sveitirnar Botnleðja og Dan Modan. Dóra Ósk Halldórsdóttir hitti kærustuparið Elízu í Bellatrix og Heiðar í Botnleðju og forvitnaðist um sambandið og framtíðina. "MÁ ÉG fá smábrokkolí," segir Elíza og horfir löngunaraugum á grænmetisbökuna á diski Heiðars sem verður strax við bóninni og réttir sinni heittelskuðu sprotakál á gaffli. Þegar grænmetisbökurnar eru búnar og kaffið komið í bollana hefst spjallið.

­ Hvað eruð þið búin að vera lengi saman?

Þau líta hvort á annað og brosa. "Það var á Músíktilraunum," segir Heiðar. "Já, við í Kolrössu vorum gestahljómsveit og þegar Botnleðja vann vorum við svo góðar að leyfa þeim að spila með okkur," segir Elíza. "Við erum búin að vera saman í fjögur ár núna í byrjun júní," segir Elíza.

­ Nú virðast sambönd ekkert endast vel í þessum tónlistarbransa, sérstaklega ekki þegar fólk sést ekki oft vegna mikilla ferðalaga. Hver er galdurinn hjá ykkur?

Elíza: "Það er kannski galdurinn, að vera ekki stöðugt samvistum," segir Elíza.

Heiðar: "Það er líka að skilningur sé á starfi hvors annars. Við erum að vinna á sama sviði og höfum mikinn skilning á þörfum hvors annars."

"Beislið þarf að vera svolítið laust hvort á öðru. Við þurfum að leyfa hinu að vera svolítið frjálst líka í því að flakka um heiminn. Ég held að það sé líka undirstaðan í okkar sambandi. Við treystum hvort öðru til þess að eltast við okkar eigin drauma og svo mætumst við bara á miðri leið."

­ Heiðar, ert þú ekki að flytja með Elízu til Lundúna?

Heiðar: "Nei, ekki núna strax. En ég flyt út eftir mánuð."

­ Þið eruð bæði skapandi listamenn. Eruð þið ekkert að spá í að vinna saman?

Elíza: "Það getur vel verið einhvern tíma. Ef þeir sem eru með okkur í hljómsveitum láta illa að stjórn þá stofnum við bara okkar eigið "band". Svona ástardúett," segir Elíza og hlær.

­ Hjónaplata með hugljúfum ástarlögum?

"Jú, þetta er allt í bígerð," segir Heiðar kíminn á svip, en svipur hans er á engan hátt sannfærandi svo líklega verður bið á ballöðunum.

­ Er mikið sungið á heimilinu?

Elíza: "Já, auðvitað. Kassagítarinn er alltaf uppi á borði og fiðlan nærtæk."

­ En hvernig er verkaskiptingin hjá ykkur? Ef þið eruð bæði úti í víking, á tónleikum öll kvöld. Hver sér þá um uppvaskið?

Elíza: "Það fær nú yfirleitt að liggja í vaskinum," segir Elíza hlæjandi, "þangað til einhver þriðji aðili gerir athugasemd."

Heiðar: "Nei, nei. Það er öllum störfum á okkar heimili skipt til helminga."

Elíza: "Hann er eiginlega húsmóðirin og ég húsbóndinn. Hann eldar og sér um þetta fína og ég er durgurinn," segir hún og skellir upp úr.

­ Færir hann þér blaðið í sófann?

Elíza: "Já, já. Á meðan ég horfi á fréttirnar."

Í víking



­ Tónleikarnir í kvöld eru auglýstir sem kveðjutónleikar Bellatrix á Íslandi. Er hljómsveitin farin af landi brott fyrir fullt og allt?

Elíza: "Við viljum nú ekki vera að slá neinu föstu um að við séum alfluttar út. Við erum að fara í víking og sjáum bara til með hvernig það gengur."

­ Nú hafið þið verið að fá mjög góða dóma erlendis.

"Jú, þetta hefur gengið mjög vel. En það hefur líka verið mikil vinna að koma sér á framfæri en við höfum trú á okkur og vonumst til að uppskera eins og við sáum. Við erum mjög ánægðar með að fjölmiðlar hafa tekið okkur svona vel. En þetta er erfiður markaður og við sáum á hátíðinni í Texas hversu framboðið er rosalegt. Það voru 800 hljómsveitir að spila þarna og allar frábærar. En maður verður að hafa sjálfstraustið í lagi og trúa á það sem maður er að gera. Vera tilbúinn að taka þátt í ævintýri og því sígaunalífi sem því fylgir."

­ En hvað með Botnleðju, eru þetta líka lokatónleikar ykkar á Íslandi?

Heiðar: "Nei, Botnleðja á eftir að spila töluvert meira í sumar og mestmegnis úti á landi. Ég fer til London ásamt Kristni Gunnari Blöndal orgelleikara um mánaðamótin júní-júlí og eftir það eru hlutirnir óráðnir."

­ Ég frétti að bæði Bellatrix og Botnleðja myndu spila á tónlistarhátíðinni í Redding í sumar.

"Já, það er rétt," segir Heiðar og Elíza bætir við að umboðsmaður Bellatrix í London, Anna Hildur Hildibrandsdóttir, hafi útvegað Botnleðju tónleikana. "Þetta tengist allt," segir hún hlæjandi. "Svo erum við líka að spila á Breeze-hátíðinni og T-in the park hátíðinni í Englandi og svo förum við til Svíþjóðar, Hollands og Portúgal, þannig að við munum flakka um Evrópu og spila á tónleikahátíðum í allt sumar."

­ Og ný smáskífa, Crash, væntanleg í júní. Eruð þið að byggja upp spenning fyrir stóru plötuna?

Elíza: "Já, það má segja það. Við ætlum að byrja að taka hana upp í haust en ég hugsa að hún komi samt ekki út fyrr en á næsta ári. Við ætlum ekki að lenda í því að keyra efnið í gegn á alltof stuttum tíma. Við ætlum bara að gera góða plötu og gefa okkur tíma í það. Þá fyrst byrjar ballið."

­ Hvað er á döfinni hjá Botnleðju, fyrir utan tónleikahald næsta mánuðinn?

Heiðar: "Það stendur til að gera smáskífu í haust úti í London. Hún kæmi þá út í kjölfar Redding-hátíðarinnar og þá munum við fara í tónleikaferð um Bretland."

­ Er stór plata þá væntanleg í kjölfarið?

Heiðar: "Já við hugsum smáskífuna sem kynningarplötu á okkur eins og Bellatrix gerði með g og dreifa henni til sem flestra aðila og sjá síðan hvað gerist upp úr því."

­ En eruð þið þá komnir með allt efni á ensku?

Heiðar: "Já, já. Núna þessa dagana erum við að vinna mikið nýtt efni og við semjum það beint á ensku. Við stefnum að því að vera með nánast eingöngu nýtt efni þegar við förum út."

­ Nú er Ester hætt í Bellatrix. Hver kemur í hennar stað?

Elíza: "Eins og er spilar Hjörtur vinur okkar með okkur til bráðabirgða. Hann er reyndar gítarleikari, en við höfum ákveðna manneskju í huga, en ég vil ekkert gefa það upp fyrr en allt er ákveðið."

­ Ef við ímyndum okkur að sú staða kæmi upp að Botnleðju gengi verr í útlöndum en Bellatrix, hver yrði þá staðan? Myndir þú fylgja Elízu eða fara heim?

Heiðar: "Jú ég myndi fylgja Elízu ef ég fengi limmósínu og kúbanskan vindil en ég er náttúrulega virkur tónlistarmaður hvort sem mér er vel tekið eða ekki."

Elíza: "Hann mundi nú ekki slá hendinni á móti limmósínu, ef það væri í boði," segir Elíza hlæjandi. "Vera bara í pels og svona."

Heiðar: "Nei, nei. Ég myndi aldrei hætta í Botnleðju til að fylgja Elízu og gera ekki neitt. Það eina sem ég vil gera er að semja tónlist og mun halda því áfram," segir Heiðar og blaðamaður fær samviskubit yfir að sjóða saman svona leiðinlegar aðstæður og fer strax yfir á jákvæðari nótur.

­ Nú hafa síðustu tvær plötur ykkar fengið mjög lofsamlega dóma. Eruð þið í Botnleðju að þróa ykkur áfram á sama sviði eða eru einhverjar breytingar á döfinni?

Heiðar: "Já, já. Við erum alltaf að þróast. Við höfum þróast frá þeirri rosakeyrslu sem við vorum fyrst þekktir fyrir. Við erum að færast yfir í alvarlegri tónlist og við gefum okkur meiri tíma."

­ Það er semsagt ekki breiðskífa eftir 25 tíma í hljóðveri, eins og ykkar fyrsta plata?

Elíza: "Þetta var algjört met," segir Elíza. "Flestir taka upp eitt lag á einum degi."

­ Utanferðin leggst bara vel í ykkur?

Heiðar: "Já, mjög vel. Við hituðum upp fyrir Blur á sínum tíma og kynntumst þessu þá og það var mjög gaman. En margir halda að svona tónleikaferðir séu bara tómt fyllirí og skandalar en það er ekki rétt. Þetta er alltof mikil vinna til að það gangi að sukka með þessu."

Elíza: "Það er hörkuvinna að spila kvöld eftir kvöld þótt það sé rosalega skemmtilegt líka. Maður þarf að sofa vel og hugsa vel um sjálfan sig. Svo fær maður svo mikið "kikk" að spila fyrir góða áheyrendur. Á síðustu tónleikunum okkar fylltum við klúbbinn Garage í London og það var ótrúlega gaman. Eftir tónleikana vorum við orðin svo æst að maður þurfti langan tíma að ná sér niður."

­ Nú heyrðist að hljómsveitirnar myndu renna saman í kvöld og verða að einni. Hvaða sveit verður það og hvað spilað?

"Botnrassa?!" segir Elíza og skellihlær. "Annars er ég að heyra fyrst af þessu núna, en þetta er athyglisvert. Það verður örugglega fín partístemmning."

Morgunblaðið/Ásdís ÓNEITANLEGA sæt saman.

ELÍZA: "Hann eldar og sér um þetta fína og ég er durgurinn."

HEIÐAR: "Það er öllum störfum á okkar heimili skipt til helminga."

ELÍZA: "Maður verður að hafa sjálfstraustið í lagi og trúa á það sem maður er að gera."

HEIÐAR: "Margir halda að svona tónleikaferðir séu bara tómt fyllirí og skandalar en það er ekki rétt."