Gróskan í stuttmyndagerð fer stigvaxandi hérlendis. Jóhann Sigmarsson segir gaman að sjá nýja kvikmyndagerðarmenn bætast í hópinn.
Stuttmyndadagar í Reykjavík að hefjast Eina íslenska kvikmyndahátíðin

Gróskan í stuttmyndagerð fer stigvaxandi hérlendis. Jóhann Sigmarsson segir gaman að sjá nýja kvikmyndagerðarmenn bætast í hópinn. STUTTMYNDADAGAR í Reykjavík verða haldnir 24., 25. og 26. maí í Tjarnarbíói. Húsið opnar kl. 19.30 hvert kvöld og verður þá sýndur hluti stuttmyndanna í keppninni, auk þess sem einn fyrirlesari flytur erindi. Fyrirlesarar verða Einar Már Guðmundsson handritshöfundur, Vilhjálmur Knudsen heimildamyndagerðarmaður og Sigurður Valgeirsson, sem heldur fyrirlestur um sunnudagsleikhúsið.

Það er Kvikmyndafélag Íslands sem stendur fyrir Stuttmyndahátíðinni, en það eru þeir Jóhann Sigmarsson og Júlíus Kemp ásamt framkvæmdastjóranum Bryndísi Jóhannsdóttur. Dómnefndina skipa Hilmar Karlsson kvikmyndagagnrýnir á DV, Guðmundur Bjartmarsson kvikmyndatökumaður og Markús Örn Antonsson útvarpsstjóri. Úrslitin verða ljós seinasta kvöldið og eru verðlaunin fyrir fyrsta, annað og þriðja sæti tvö hundruð þúsund, eitt hundrað þúsund og fimmtíu þúsund krónur, sem Reykjavíkurborg gefur. Í ár mun DV einnig veita sérstök verðlaun.

Vettvangur fyrir áhugamenn og fagfólk

"Þetta er í níunda sinn sem Stuttmyndadagar verða haldnir," segir Jóhann Sigmarsson frumkvöðull hátíðarinnar. "Þegar ég stofnaði hátíðina vildi ég að fagfólk og áhugamenn gætu komið saman og skoðað þær stuttmyndir sem verið var að gera. Það var mjög lítið um að stuttmyndir væru sýndar opinberlega og ekkert sem kynnti þennan vettvang. Ég hef alltaf haldið því fram að stuttmyndin væri mjög mikilvægur hluti kvikmyndagerðar, og ekki síst fyrir þá sem eru að stíga sín fyrstu skref sem kvikmyndagerðarmenn.

Í dag er mjög mikil gróska í stuttmyndagerð og margir frægir kvikmyndagerðarmenn sem nota þetta form. Því stuttmyndin er ekki bara fyrir byrjendur, og ég kýs að lýsa stuttmyndinni sem ljóði kvikmyndanna, sem er einnig erfitt að gera vel."

­ En er þessi stuttmyndahátíð ekki tileinkuð þeim sem eru að stíga sín fyrstu skref?

"Nei, eiginlega ekki. Þegar ég hélt hátíðina í fyrsta sinn voru menn eins og Óskar Jónasson, Júlíus Kemp og Steinþór Birgisson meðal þátttakenda. Friðrik Þór Friðriksson er að gera stuttmynd, og honum er frjálst að taka þátt ef honum sýnist næsta ár. Allar myndirnar hingað til hafa verið gerðar af Íslendingum, sem er gott mál. En gróskan fer stigvaxandi og við Bryndís erum að vinna að því að hátíðin verði alþjóðleg á næsta ári. Við vonumst þá til að fá erlendar myndir í keppnina og erlenda fyrirlesara. Þá myndum við auðvitað flokka myndirnar niður, og ég hef hugsað mér að það verði eftir reynslu leikstjórans, en ekki lengd mynda, eins og sumar hátíðir gera. Það verður flott að vera með alþjóðlega kvikmyndahátíð í Reykjavík."

Ótrúleg aukning

"Það hafa aldrei verið sendar inn jafn margar stuttmyndir til keppni og í ár. Sextíu myndir eru skráðar, en svo verður eitthvað af aukamyndum. Ég býst við að þessi aukning stafi af því að það er mun auðveldara í dag að gera stuttmynd en var fyrir nokkrum árum. Ég er viss um að ef Leonardo Da Vinci væri á lífi, myndi hann gera stuttmyndir jafnt sem auglýsingar. Hann væri örugglega að gera Nike- auglýsingu."

- Hvað finnst þér það besta sem þessi stuttmyndahátíð hefur leitt af sér undanfarin ár?

"Hún hefur alið af sér marga góða kvikmyndagerðarmenn sem eru að vinna við greinina í dag. Hvatt þá til að halda áfram á þessari braut. Svo eru Stuttmyndadagar orðnir árviss hluti af menningarlífi borgarinnar. Þeir eru skemmtilegir, mikið að gerast og það er gaman að fylgjast með nýju fólki bætast í hóp kvikmyndagerðarmanna.

Ég hef tekið eftir því að kvikmyndagerðarmenn, bæði yngri og eldri, eru að stinga rýtingi í bakið hver á öðrum, og það er mikil samkeppni þeirra á milli. Stuttmyndadagar hafa orðið vettvangur fyrir kvikmyndagerðarfólk til að hittast og viðra ólíkar skoðanir sín á milli.

Auk þess er þetta eini vettvangurinn fyrir íslenska kvikmyndagerðarmenn til að sýna verk sín hérlendis. Á Kvikmyndahátíð í Reykjavík eru bara erlendar kvikmyndir. Þetta er eina íslenska kvikmyndahátíðin."

Morgunblaðið/Golli BRYNDÍS Jóhannsdóttir og Jóhann Sigmarsson hafa veg og mlvanda að Stuttmyndahátíð Reykjavíkur í ár.

Morgunblaðið/Ásdís ÚR stuttmyndinni Verðlaunabikarinn eftir G.H.Ö. og M.H.Í.

PÓSTUR í óskilum eftir Jón Ásgeir Gestsson og Guðmund Pálsson.

ÚR Deginum eftir , stuttmynd Karls Inga Karlssonar.