ÚTVARPSMENNIRNIR Sigurjón Kjartansson, Jón Gnarr og Jón Atli Jónasson, starfsmenn útvarpsstöðvarinnar X-ins, voru í gær í Héraðsdómi Reykjavíkur fundnir sekir um röskun á fundarfriði Alþingis, en ákvörðun refsingar var frestað og fellur hún niður að ári liðnu, haldi þeir skilorð. Jón Atli fór 18. desember sl.
Útvarpsþátturinn Tvíhöfði

Trufluðu fundarfrið Alþingis

ÚTVARPSMENNIRNIR Sigurjón Kjartansson, Jón Gnarr og Jón Atli Jónasson, starfsmenn útvarpsstöðvarinnar X-ins, voru í gær í Héraðsdómi Reykjavíkur fundnir sekir um röskun á fundarfriði Alþingis, en ákvörðun refsingar var frestað og fellur hún niður að ári liðnu, haldi þeir skilorð.

Jón Atli fór 18. desember sl. á þingpalla Alþingis með farsíma sem tengdur var beinni útsendingu útvarpsstöðvarinnar og hafði verið falið af þáttastjórnendunum, Sigurjóni og Jóni Gnarr, að trufla störf þingsins í þeim tilgangi að láta handtaka sig. Fastur liður í þættinum var svonefnd "föstudagshandtaka".

Jón Atli kallaði yfir þingsal: "Góðan daginn, þið hafið svikið fólkið með gagnagrunnsfrumvarpinu. Fólkið í landinu mun ekki líða þetta." Þingvörður kom þá að og færði Jón á brott til handtöku.

Á myndbandsupptöku sést að ræðumaður á þingfundi hikaði þegar kallað var fram í, en hélt síðan áfram. Héraðsdómur komst því að þeirri niðurstöðu að framíkallið hefði raskað fundarfriði Alþingis, og varðar það við almenn hegningarlög.

"Enginn hinna ákærðu hefur áður sætt refsingu. Þegar ofanritað er virt og tilgangurinn með uppákomunni, sem virðist hafa verið grín, en ekki nokkurs konar andúð í garð Alþingis, þykir eftir atvikum rétt að fresta ákvörðun refsingar allra ákærðu skilorðsbundið í 1 ár frá birtingu dómsins að telja og skal refsingin falla niður að þeim tíma liðnum haldi hver hinna ákærðu fyrir sig almennt skilorð . . ." segir meðal annars í dómsorðum. Hinir ákærðu voru dæmdir til að greiða allan málskostnað.

Dómari var Guðjón St. Marteinsson en verjandi Helgi Jóhannesson hæstaréttarlögmaður.