KVIKMYNDIR/Laugarásbíó sýnir kvikmyndina At First Sight með þeim Val Kilmer og Miru Sorvino í aðalhlutverkum. Myndin er byggð á sannsögulegri sögu læknisins og höfundarins Olivers Sacks. Þegar augun ljúkast upp Frumsýning
KVIKMYNDIR /Laugarásbíó sýnir kvikmyndina At First Sight með þeim Val Kilmer og Miru Sorvino í aðalhlutverkum. Myndin er byggð á sannsögulegri sögu læknisins og höfundarins Olivers Sacks.

Þegar augun ljúkast upp

Frumsýning VIRGIL (Val Kilmer) hefur verið blindur frá barnæsku. Hann býr í öruggu hverfi í New York þar sem allir þekkja hann og hann starfar sem nuddari. Þegar hann hittir Amy (Mira Sorvino) sem er stressaður arkitekt á Manhattan breytist líf hans. Í upphafi gerir hún sér ekki grein fyrir að hann sé blindur og hún fer að trúa honum fyrir sínum innstu leyndarmálum. Virgil veitir Amy traust og blíðu sem hún hefur aldrei kynnst áður. Þau verða ástfangin og Virgil ákveður að prófa að fara í aðgerð í von um að fá sjónina aftur. Hann fer til augnsérfræðingsins Phil Webster (Nathan Lane) sem undirbýr hann fyrir augnaðgerðina. Ef aðgerðin tekst verður Virgil að læra á heiminn upp á nýtt, verða eins og nýfætt barn á ný sem uppgötvar heiminn í fyrsta skipti á nýjan hátt.

At First Sight er byggð á bók Olivers Sacks, To See and Not See. Sacks hefur hlotið fjölmargar viðurkenningar fyrir bækur sínar, en hann er einnig þekktur læknir. Meðal verka hans er bókin Awakenings, en mynd byggð á þeirri bók hlaut Óskarstilnefningu á sínum tíma. Aðrar þekktar bækur hans eru m.a. The Man Who Mistook His Wife for a Hat og The Island of the Colorblind. Saga hans To See and Not See birtist í ritgerðasafninu An Anthropologist on Mars og er byggð á sannri sögu.

Oliver Sacks segir um söguna að blint fólk hafi ótrúlega þróað snertiskyn. Í upphafi sögunnar er Virgil sáttur við líf sitt þrátt fyrir blindu sína á meðan Amy sem virðist á yfirborðinu hafa allt sem fólk sækist eftir eins og starfsframa er sú sem á við mun meiri vandamál að stríða. "Ég á vin í Nýju Mexíkó, myndhöggvara, sem missti sjónina í Víetnam," segir Val Kilmer. "Ég lærði heilmikið af honum. Hann hefur mikla kímnigáfu og innri styrk. Virgil líkist honum talsvert."

Leikstjórinn Irvin Winkler á að baki farsælan feril, en kvikmyndir hans hafa hlotið tólf Óskarsverðlaun og 45 tilnefningar til Óskarsverðlauna. Meðal þekktra mynda hans eru Raging Bull, The Right Stuff, GoodFellas og They Shoot Horses, Don't They, allt myndir sem hafa hlotið einróma lof gagnrýnenda. "Vísinda- og læknisfræðilegur þáttur sögunnar er mjög áhugaverður, en það var samt mannlegi þátturinn sem dró mig að þessari mynd," segir Winkler. "Ég held að fólk muni vilja sjá myndina af því að hún sýnir hvernig hjörtu mannanna slá."

VAL Kilmer og Mira Sorvino sem Virgil og Amy.

NATHAN Lane í hlutverki læknisins og Val Kilmer.

LEIKSTJÓRINN Irwin Winkler með dr. Oliver Sacks sem skrifaði söguna.