DEBENHAMS verður fyrsta erlenda deildaskipta stórverslunin á Íslandi með fatnað, snyrtivörur og ýmsan heimilisvarning en hún verður opnuð í Smáralind árið 2001. Guðbjörg R. Guðmundsdóttirbrá sér í Debenhams í Brighton í vikunni ásamt nýráðnum framkvæmdastjóra Debenhams á Íslandi, Bryndísi Hrafnkelsdóttur.
Debenhams í Smáralind árið 2001

Alvöru "magasín"

á tveimur hæðum

DEBENHAMS verður fyrsta erlenda deildaskipta stórverslunin á Íslandi með fatnað, snyrtivörur og ýmsan heimilisvarning en hún verður opnuð í Smáralind árið 2001. Guðbjörg R. Guðmundsdóttir brá sér í Debenhams í Brighton í vikunni ásamt nýráðnum framkvæmdastjóra Debenhams á Íslandi, Bryndísi Hrafnkelsdóttur. MARGAR nýjar verslanir hafa sprottið upp hér á landi undanfarin ár og það er dálítið skrítin tilfinning að þramma niður Oxford stræti í London og þekkja nöfn verslananna að heiman svo sem Morgan, Oasis, Monsoon, Accessorize, og H&M. Og nú stendur fyrir dyrum hjá Baugi að opna Top Shop innan skamms og árið 2001 deildaskiptu stórverslunina Debenhams í Smáralind.

Áformað er að Debenhams verði á tveimur hæðum í 4.000-5.000 fermetra húsnæði. Þessi nýja verslunarsamstæða, sem mun heita Smáralind, er byggð upp þannig að tvær stórverslanir verða hvor í sínum enda hennar og 110­130 verslanir og þjónustufyrirtæki á milli. Hagkaup verður í öðrum enda byggingarinnar í 10.000 fermetra húsnæði og þess má geta að matvöruverslanirnar verða tvær því jafnframt er reiknað með að Nóatún verði með tæplega þúsund fermetra pláss í Smáralind. Gert er ráð fyrir að byggingin verði alls 54.000 fermetrar að stærð.

Nýtt útlit Debenhams búðanna

Bryndís Hrafnkelsdóttir, sem er nýráðinn framkvæmdastjóri Debenhams á Íslandi, hefur undanfarin ár starfað sem fjármálastjóri Hagkaups. Við heimsóttum Debenhams í Brighton nú í vikunni en sú búð var opnuð fyrir hálfu ári og er svipuð að stærð og sú verslun sem verður í Smáralind. Verslunin í Brighton gefur einnig góða mynd af því sem íslenskir neytendur geta búist við því hún er hönnuð í samræmi við áform Debenhams um framtíðarútlit verslananna.

Breidd í vöruverði

Debenhams er svona eins og forframaðir ferðalangar hefðu sagt hér á árum áður að væri "ekta magasín á mörgum hæðum" og í Brighton er Debenhams á þremur hæðum í nýrri verslunarsamstæðu miðsvæðis í bænum. Það er hvorki hægt að segja að Debenhams sé ódýr né dýr verslun því það er töluverð breidd í úrvali og vöruverði. Viðskiptavinir geta keypt ódýrar herraskyrtur, borgað meðalverð fyrir þær eða keypt dýrar skyrtur. Það er stefna hjá Debenhams að hafa nokkra breidd í vöruvali og hafa verðið mismunandi eftir gæðum enda eru hátt í 300 vörumerki seld í Debenhams.

Aðalinngangurinn í Debenhams í Brighton er á annarri hæð. Á þeirri hæð er snyrtivörudeildin áberandi og herrafatnaði gefið mikið pláss. Snyrtivörudeildin er öðruvísi en víða annarsstaðar í deildaskiptum stórverslunum. Þar geta viðskiptavinir gengið um og valið sjálfir snyrtivörurnar. Þá er einnig boðið upp á þjónustu snyrtifræðings sem hefur aðstöðu innaf snyrtivörudeildinni. Hann tekur viðskiptavini í andlitsbað, plokkun og litun, slökun og handsnyrtingu svo dæmi séu tekin og sérstök dagskrá er fyrir brúðir.

Herrafatadeildin var skemmtilega uppsett, það er að segja skipulagið var eftirtektarvert. Herraskyrtur voru flokkaðar eftir vörumerkjum og síðan eftir litum og allar merkingar voru mjög skýrar. Síðan var sérdeild undir nærfatnað herra, afmarkað pláss fyrir sokka og svo mætti áfram telja.

Mæla brjóstastærðir

Kvenfatnaðurinn var niðri í þessari verslun og þar var gluggalaust, lægra undir loft en á hinum hæðunum og teppi á gólfum. Eftir að hafa verið á hinum hæðunum fann maður hvað birtan skiptir miklu máli. Á þessari hæð var líka sérstök undirfatadeild fyrir konur. Þar var viðskiptavinum boðið upp á að fá tíma hjá starfsmanni deildarinnar til að fá úr því skorið hvaða brjóstahaldarastærð hentar. Í ljós hefur komið að í Bretlandi virðast allt að 75% kvenna ganga í röngum stærðum af brjóstahaldara og hjá Debenhams hefur þessi þjónusta verið mikið notuð.

Stærsta brúðkaupsgjafaþjónustan

Forráðamenn hjá Debenhams hafa fitjað upp á ýmsum öðrum nýjungum. Þeir hafa undanfarin þrjú ár boðið upp á brúðkaupsgjafaþjónustu og eru í dag stærstir í Bretlandi á þeim vettvangi. Þjónustan virkar þannig að verðandi brúðhjón koma í Debenhams með góðum fyrirvara og fara í sérstaka deild sem ætluð er brúðhjónunum. Þar fá þau í hendur skanna sem þau ganga með um búðina og beita á þá hluti sem þau kjósa að fá í brúðkaupsgjöf. Skanninn les númer af vörunum og færir þær á nafn brúðhjónanna. Gestir geta síðan komið í Debenhams hvar sem er í Bretlandi og fengið þennan lista í hendur en hlutirnir eru strokaðir jafnóðum af listanum og þeir eru keyptir. Þegar brúðhjónin eru gefin saman fá þau síðan gjafabréf frá Debenhams sem hljóðar upp á 5% af því sem gestirnir hafa keypt fyrir handa þeim.

Kaffihúsin nauðsynleg

Þegar farið er í deildarskipta stórverslun í útlöndum er nauðsynlegt að geta sest niður og fengið sér kaffi í miðjum verslunarleiðangri. Bryndís segir að í Debenhams á Íslandi verði komið á fót kaffihúsi. Á veitingastaðnum í Brighton var lítið horn fyrir börnin. Þar gátu þau raðað í sérstök barnabox því sem hugur girntist úr sérstöku barnaborði. Bryndís segir að lögð verði áhersla á að koma upp góðu kaffihúsi í Debenhams í Smáralind.

Baugur sér um reksturinn

Hún bendir á að verslunin heima verði byggð upp í samvinnu við Debenhams í Bretlandi enda um að ræða sérleyfissamning. Baugur hefur því með allan rekstur fyrirtækisins hér heima að gera. Vörurnar segir Bryndís að verði valdar á forsendum starfsfólksins hér heima enda markaðurinn í Bretlandi og á Íslandi ekki alveg eins. "Vöruvalið verður skoðað á næstu mánuðum og ákveðið hvaða leiðir verða valdar. Sumt heillar meira en annað og það eru nokkrar deildir sem ég held að við ættum að leggja meiri áherslu á en aðrar. Enn sem komið er er þó alltof fljótt að ræða um það því fram til ársins 2001 kann margt að breytast í þeim efnum."

Þegar Bryndís er spurð hvort verðið verði sambærilegt og það er í Bretlandi segir hún að lögð verði kapp á að Debenhams á Íslandi verði samkeppnisfær við Debenhams í Bretlandi.

200 ára fyrirtæki

Debenhams fyrirtækið stendur á gömlum merg en það var stofnað fyrir rúmlega tvö hundruð árum. Mikið vatn hefur runnið til sjávar síðan þá og nú eru verslanir Debenhams orðnar 95 talsins, flestar í Englandi en einnig í Skotlandi og á Írlandi. Á næstu árum stendur til að opna nokkrar nýjar verslanir í Bretlandi og halda áfram með að taka þær búðir sem fyrir eru í gegn.

Fyrir tveimur árum gekk Debemhams opinberlega frá fyrsta sérleyfissamningnum við fyrirtæki utan Bretlands, M H Alshaya Group í Mið-Austurlöndum. Fyrsta búðin var opnuð í Barein, þá önnur í Kúveit í september sl. og í Dúbaí fyrir nokkrum vikum. Í haust verður síðan fjórða verslunin opnuð í Jeddah. Baugur er annað fyrirtækið sem Debenhams gerir við sérleyfissamning og Debenhams í Smáralind verður þá fimmta verslunin utan Bretlands. Stefnt er að því opna fleiri verslanir utan Bretlands á næstu árum.

Morgunblaðið/Guðbjörg R. Guðmundsdóttir

BRYNDÍS Hrafnkelsdóttir, nýráðinn framkvæmdastjóri Debenhams á Íslandi, segir að á næstu mánuðum skýrist hvernig deildaskiptingin verði í Debenhams en verslunin verður á tveimur hæðum.

ÞAÐ er stefna hjá Debenhams að hafa nokkra breidd í vöruvali og hafa verðið mismunandi eftir gæðum enda eru yfir 90 merkjavörur seldar í Debenhams. Í Brighton var hægt að fá skyrtur á lágu verði, meðalverði og dýrar skyrtur, allt eftir merkjum og gæðum.

Á VEITINGASTAÐNUM í Debenhams var sérstakt borð fyrir börn þar sem þau gátu valið í barnabox það sem hugur girntist.

VÖRUR til heimilisins taka mikið rými í búðinni í Brighton, rúmfatnaður, handklæði, búsáhöld, gluggatjöld og gjafavörur af ýmsum toga.