Kennslukonan og konungurinn

KVIKMYNDIR/Bíóhöllin, Kringlubíó, Nýja bíó Keflavík og Nýja bíó Akureyri frumsýna bandarísku teiknimyndina Kóngurinn og ég, sem talsett er á íslensku Kennslukonan og konungurinn Frumsýning

TEIKNIMYNDIN Kóngurinn og ég segir frá því þegar bresk kennslukona réðst við hirð konungsins af Síam að kenna börnum hans vestræna siði. Hún er byggð á sannri sögu Önnu Leonowen eins og henni er lýst í bókinni Anna og konungurinn af Síam eftir Margaret Landon en upp úr henni var saminn frægur Broadway ­ söngleikur með lögum eftir Richard Rodgers og Oscar Hammerstein. Síðar var söngleikurinn kvikmyndaður og nú hefur Warner Bros. kvikmyndaverið sent frá sér þessa teiknimynd sem sniðin er eftir söngleiknum og er með lögum þeirra Rodgers og Hammerstein. Teiknimyndin hefur verið talsett á íslensku og fer Egill Ólafsson með hlutverk konungsins en Þórunn Lárusdóttir talar fyrir kennslukonuna. Aðrir leikarar eru m. a.: Þórhallur Sigurðsson, Arnar Jónsson, Selma Björnsdóttir, Rúnar Freyr Gíslason, Grímur Gíslason og Hilmir Snær Guðnason. Bíómyndin Konungurinn og ég var gerð árið 1956. "Fjölskyldur þekkja vel til þessarar frábæru sögu," er haft eftir framleiðanda teiknimyndarinnar, James G. Robinson. "Við vildum segja hana upp á nýtt og varðveita um leið söngvana góðu og gæta þess að hún yrði mjög aðgengileg ungum börnum. Okkur fannst teiknimyndaformið upplagt í þeim tilgangi." Hann sótti um leyfi fjölskyldna Rodgers og Hammersteins til þess að ráðast í framleiðslu teiknimyndarinnar og var það auðfengið. Teiknimyndaleikstjórinn Richard Rich var ráðinn til þess að hafa umsjón með verkinu en hann á að baki teiknimyndir eins og Svarta pottinn og Svanaprinsessuna. "Þetta er saga sem hefur margt með sér," er haft eftir honum. "Sögusviðið er mjög spennandi með sínum glæsihöllum og búningum og sagan sjálf inniheldur spennu því hún segir af tilraun til þess að koma konunginum frá völdum. Þetta er líka ástarsaga á milli kennslukonunnar Önnu og konungsins og hún segir frá hópi glaðværra krakka sem eru eins og allir aðrir krakkar um allan heim þótt þeir séu fæddir í konungshöll." Framleiðandinn Robinson tekur undir það. "Okkur leist svo á að krakkarnir væru lykillinn að vel heppnaðri teiknimynd," segir hann. "Samband þeirra við nýju kennslukonuna er í miðpunkti sögunnar. Við vildum að teiknimyndin fjallaði um vinskap, sambandið á milli ólíkra menningarheima og hvernig við getum lært að skilja hvert annað þrátt fyrir ólíkan uppruna." Við gerð teiknimyndarinnar var blandað saman hefðbundinni teiknimyndatækni, sem notast hefur verið við áratugum saman í Hollywood eða frá því Walt Disney var þar á dögum, og nýtísku tölvutækni í gerð teiknimynda. Teiknivinnan fór fram um allan heiminn með hjálp tölvutækninnar, Kalíforníu, Írlandi og Kóreu. Þannig unnu t.d. asískir teiknarar við að skapa mannlífið í Síam og þar fram eftir götunum. Konungurinn og kennslukonan með nokkrum af persónunum í teiknimyndinni Konungurinn og ég.