Sunnudaginn 7. nóvember á allraheilagramessu í Hallgrímskirkju kl. 11 verður messa og barnastarf. Sr. Sigurður Pálsson prédikar og þjónar fyrir altari ásamt sr. Jóni D. Hróbjartssyni. Hópur úr Mótettukórnum syngur og Hörður Áskelsson verður organisti.

Sunnudaginn 7. nóvember á allraheilagramessu í Hallgrímskirkju kl. 11 verður messa og barnastarf. Sr. Sigurður Pálsson prédikar og þjónar fyrir altari ásamt sr. Jóni D. Hróbjartssyni. Hópur úr Mótettukórnum syngur og Hörður Áskelsson verður organisti. Eftir messu mun kvenfélag Hallgrímskirkju verða með kaffiveitingar til ágóða fyrir kaup á nýjum skírnarfonti.

Kl. 20 verður kvöldmessa. Þar syngur Schola cantorum undir stjórn Harðar Áskelssonar organista. Dr. Sigurður Árni Þórðarson flytur hugleiðingu og þjónar fyrir altari ásamt sr. Jóni D. Hróbjartssyni. Kvöldmessa verður með einföldu sniði. Lögð verður áhersla á íhugun og bæn. Látinna verður minnst m.a. með því að tendra bænaljós.

Líknarsjóðskaffi í Grafarvogskirkju

Næstkomandi sunnudag 7. nóvember, á allraheilagramessu, er guðsþjónusta kl. 14 í Grafarvogskirkju. Þennan dag, þar sem hinna heilögu og látinna er minnst, þjóna fyrir altari og predika séra Vigfús Þór Árnason og séra Sigurður Arnarson. Kór Grafarvogskirkju og Unglingakór kirkjunnar syngja undir stjórn Harðar Bragasonar organista og Oddnýjar Þorsteinsdóttur kórstjóra.

Eftir guðsþjónustu er svonefnt líknarsjóðskaffi. Sóknarnefnd og prestar gefa veitingar, en ágóði af kaffisölu rennur til styrktar fjölskyldum í fjárhagsörðugleikum. Framlag úr sjóði Safnaðarhjálparinnar, sem Gísli Sigurbjörnsson heitinn, fyrrverandi forstjóri elliheimilisins Grundar, stofnaði, kemur sem mótframlag í sjóðinn. Allir eru velkomnir. Prestarnir.

Þegar kirkjan flutti á mölina

Á fræðslumorgni í Hallgrímskirkju í fyrramálið kl. 10 mun Þórarinn Björnsson guðfræðingur flytja erindi í erindaflokknum Þættir úr þúsund ára sögu, sem hefur verið sameiginleg yfirskrift fræðslumorgnanna á þessu hausti. Erindi Þórarins nefnist: Þegar kirkjan flutti á mölina. Æskulýðsstarf séra Friðriks Friðrikssonar.

Um síðustu aldamót var íslenskt samfélag að breytast úr dreifbýlis- í þéttbýlissamfélag. Kirkjan hafði um aldir verið samferða þjóðinni í hinum dreifðu byggðum landsins. Nú reyndi á hvort henni tækist að temja sér ný vinnubrögð við nýjar aðstæður. Það var á þessum tímamótum sem séra Friðrik Friðriksson hóf kristilegt barna- og unglingastarf í Reykjavík, sem fæddi af sér KFUM og KFUK, sem fagna 100 ára afmæli á þessu ári, knattspyrnufélagið Val, skátafélagið Væringja, hornaflokkinn Sumargjöfina, Karlakór KFUM (síðar Fóstbræður) og fleiri félög. Þórarinn mun í erindi sínu greina frá upphafi þessa umfangsmikla starfs æskulýðsleiðtogans séra Friðriks Friðrikssonar, eins af mestu áhrifamönnum í íslensku kirkjulífi á þessari öld.

Minning látinna í Laugarneskirkju

Í nóvemberbyrjun ár hvert er haldin allraheilagamessa. Þá minnist kirkjan um gjörvalla veröld þeirra sem látnir eru, og víða kemur fólk saman til minningarathafna. Fyrir ári var sú nýbreytni gerð í Laugarneskirkju að halda minningu látinna við sérstaka kvöldsamveru. Gafst það vel og varð stundin mörgu fólki til huggunar og hjálpar. Um er að ræða stutta en hugljúfa minningarstund með fallegri tónlist og kertaljósum sem syrgjendum gefst kostur á að tendra í minningu ástvina sinna. Eru ljósin svo borin upp að altarinu, þar sem þau brenna sem hljóð bæn um leið og nöfn hinna látnu eru lesin upp.

Að þessu sinni mun samveran haldin föstudagskvöldið 12. nóvember kl. 20, en ekki sunnudagskvöldið 7. nóvember eins og auglýst var í Kirkjuvísi safnaðarins í haust. Er stundin ætluð öllum syrgjendum sem koma vilja. Nöfn þeirra sem ég hef jarðsungið sl. ár munu nefnd við altarið í bæn og sjálfsagt er að taka við fleiri nöfnum inn í minningarbænina á skrifstofutíma í síma 588-9422.

Að samveru lokinni gefst fólki kostur á að koma yfir í safnaðarheimilið, fá sér heitt í bolla og hlýða á fræðsluerindi um sorg og sorgarviðbrögð.

Bjarni Karlsson, sóknarprestur Laugarneskirkju. Allraheilagramessa í Breiðholtskirkju

Fyrsta sunnudag í nóvember höldum við í lútersku kirkjunni að fornum sið allraheilagramessu, en á allraheilagramessu minnist hinn kristni söfnuður sérstaklegra þeirra sem látnir eru í trú á Drottin og þakkað er fyrir líf þeirra og þjónustu. Af þessu tilefni verður á morgun sérstök messa í Breiðholtskirkju í Mjódd kl. 11 þar sem Kór Breiðholtskirkju syngur stólvers, eldri barnakór kirkjunnar syngur og tendruð verða kertaljós í minningu látinna.

Bent skal á, að eins og ávallt er barnaguðsþjónusta í safnaðarheimilinu á sama tíma og messan. Að messu lokinni verður síðan boðið upp á létta máltíð í safnaðarheimilinu eins og jafnan er gert hjá okkur í Breiðholtskirkju einu sinni í mánuði.

Sr. Gísli Jónasson. Fundur í safnaðarfélagi Dómkirkjunnar

Almennur fundur verður haldinn í Safnaðarfélagi Dómkirkjunnar á allraheilagramessu sunnudaginn 7. nóvember nk., kl. 12 á hádegi, strax að lokinni árdegismessu í Dómkirkjunni. Messan hefst kl. 11:00 og mun sr. Hjalti Guðmundsson dómkirkjuprestur prédika og þjóna fyrir altari og Dómkórinn syngja við orgelleik Marteins H. Friðrikssonar.

Á safnaðarfélagsfundinum mun sr. Hjalti Þorkelsson, prestur í kaþólsku kirkjunni og skólastjóri Landakotsskóla, halda stutt erindi um fagnaðarárið 2000 í kaþólskum sið og hvernig sá kaþólski siður að halda fagnaðarár hefur þróast. Á fundinum munu Marteinn H. Friðriksson dómorganisti og María Marteinsdóttir fiðluleikari einnig verða með tónleika.

Fundir Safnaðarfélags Dómkirkjunnar eru haldnir eftir árdegismessu fyrsta sunnudag hvers mánaðar og hefjast um kl. 12:00 á hádegi. Þeir eru haldnir á 2. hæð í Safnaðarheimili Dómkirkjunnar á horni Vonarstrætis og Lækjargötu og standa yfirleitt í rúma klukkustund. Fundirnir hefjast með léttum málsverði á vægu verði og að því loknu koma valdir gestir í heimsókn, sem halda stutt erindi um hin ýmsu málefni.

Fundir Safnaðarfélagsins eru opnir öllum velunnurum Dómkirkjunnar, innan sóknar sem utan, og eru þeir tilvalið tækifæri til að mynda og styrkja tengsl við Dómkirkjuna.

Stjórn Safnaðarfélags Dómkirkjunnar. Allra heilagra messa í Hafnarfjarðarkirkju

Næstkomandi sunnudag er haldin hátíðleg allraheilagramessa í kirkjum landsins. Af því tilefni verður mikið um að vera í Hafnarfjarðarkirkju. Við hefjum daginn kl. 11 með Fjölskylduhátíð í kirkjunni. Barna- og unglingakórinn syngur undir stjórn Hrafnhildar Blomsterberg og eftir hátíðina er boðið upp á góðgæti í safnaðarheimilinu. Allir starfsmenn sunnudagaskólans taka þátt í hátíðinni. Prestar eru sr. Þórhallur Heimisson og sr. Þórhildur Ólafs. Sunnudagaskólarútan ekur að venju en auk þess fer strætisvagn á Hvaleyrarskála kl. 10.50 og heim aftur eftir hátíðina.

Kl. 17.00 höldum við Ljósamessu. Þar minnumst við látinna ástvina. Sr. Heimir Steinsson, prestur og þjóðgarðsvörur á Þingvöllum, talar um hina kristnu eilífðarvon. Öllum kirkjugestum er boðið að tendra ljós í minningu látinna um leið og gengið er til altaris. Kór Hafnarfjarðarkirkju syngur undir stjórn Natalíu Chow. Allir prestar kirkjunnar taka þátt. Eftir ljósamessuna er boðið upp á kaffi í safnaðarheimilinu Strandbergi.

Prestar Hafnarfjarðarkirkju. Dómkirkjan: Minning látinna

Allraheilagramessa er 1. nóvember og allrasálnamessa 2. nóvember. Um þá daga er minnst þeirra sem dánir eru og guðsþjónustur haldnar næsta helgan dag á eftir.

Á allraheilagramessu er athyglin á þeim sem hafa styrkt kirkjuna í gegnum aldirnar. Trúarhetjanna er minnst, bæði þeirra nafnfrægu og þeirra sem ekki eiga nöfn sín á spjöldum annarrar sögu en okkar eigin og kannski á fáeinna annarra sem þekktu þær. Á allra sálna messu er hugurinn bundinn þeim öllum sem við söknum. Þekkt er með öðrum þjóðum að mikið er gert úr þessum dögum. Þessi helgi hefur í vaxandi mæli skipað sér sess í trúarlífi okkar og víða verið hátíðleg haldin, m.a. í Dómkirkjunni í Reykjavík. Þar hafa verið um árabil minningarstundir og minnisverðar predikanir haldnar út af tilefni dagsins. Ekki verður brugðið út af vananum þessu sinni. Síðdegisguðsþjónustan sunnudaginn 7. nóvember kl. 16 (ath. tímasetningu) verður helguð minningu látinna. Þeir sem vilja nota tilefnið og minnast ástvina sinna eru boðnir velkomnir. Við bjóðum þeim sem syrgja að tendra ljós í minningu þeirra sem þeir sakna, njóta uppbyggingar í tali og tónum og fela með okkur minningu þeirra í bæninni.

Við guðsþjónustuna syngur Dómkórinn við undirleik Marteins H. Friðrikssonar dómorganista, sr. Jakob Ágúst Hjálmarsson prédikar og annast altarisþjónustu.

Kirkjuganga frá Neskirkju að Dómkirkjunni

Síðastliðinn laugardag var farin fyrsta gönguferð af fjórtán sem áætlaðar eru á milli kirkna innan Reykjavíkurprófastsdæma í tilefni 1000 ára afmælis kristnitöku á Íslandi og var gengið frá Seltjarnarneskirkju að Neskirkju. Kristnitökuhátíð Reykjavíkurprófastsdæma á frumkvæði að göngunum, sem farnar eru í samvinnu við Ferðafélag Íslands og Útivist. Gönguferðirnar verða á laugardagsmorgnum út nóvember og hefjast að nýju í febrúar.

Á laugardaginn kemur, 6. nóvember, er ætlunin að ganga á milli Neskirkju og Dómkirkjunnar og er brottför með rútu frá BSÍ, en einnig er hægt að mæta við upphafsstað. Áætlað er að hver ferð taki 3 klst. en í þessu tilviki er ekki um langa göngu að ræða, svo meiri tími gefst til að litast um á leiðinni í fylgd fararstjóra ferðafélaganna, en einnig fer fulltrúi kirkjunnar með hópnum. Gengið verður að Kristskirkju í Landakoti sem vígð var fyrir 70 árum. Þar verður tekið á móti hópnum af presti frá kaþólska söfnuðinum, en vegna viðgerða á kirkjunni er því miður ekki hægt að skoða hana. Gengið verður á slóðir Ingólfs landnámsmanns í Aðalstræti, en síðan er móttaka í Herkastalanum og hann skoðaður. Gengið verður út í Hallargarðinn og um Austurvöll í Dómkirkjuna þar sem prestur tekur á móti hópnum og fræðir um hana, en hún var vígð árið 1796. Í kirkjugöngunum er afhent blað með upplýsingum um kirkjurnar og með formlegum stimpli hennar og í lok hverrar göngu er boðið upp á kaffiveitingar hjá viðkomandi söfnuði, en þessari göngu lýkur með kaffiveitingum í safnaðarheimili Dómkirkjunnar. Það verður rútuferð til baka. Öllum er velkomið að vera með, þátttökugjald er 500 kr. en frítt f. börn 15 ára og yngri með foreldrum sínum.

Kvennakirkjan í Laugarneskirkju

Kvennakirkjan heldur guðsþjónustu í Laugarneskirkju sunnudaginn 7. nóvember kl. 20.30. Umfjöllunarefni messunnar verður baráttan gegn klámi og vændi. Rannveig Jónsdóttir cand. mag. og framhaldsskólakennari prédikar, en hún hefur undanfarið verið í fararbroddi kvennakirkjukvenna sem hafa kynnt sér rekstur nektardansstaða í borginni og átt þátt í að koma af stað gagnrýninni umræðu um klám og vændi. Erla Berglind Einarsdóttir syngur einsöng. Kór Kvennakirkjunnar leiðir almennan söng undir stjórn Aðalheiðar Þorsteinsdóttur. Á eftir verður kaffi í safnaðarheimilinu.

Mánudaginn 8. nóvember kl. 17.30 verður fundur í húsi Kvennakirkjunnar í Þingholtsstræti 17. Gestur fundarins verður Ósk Ingvarsdóttir kvensjúkdómalæknir og varaformaður Fræðslusamtaka um kynlíf og barneignir. Hún mun kynna samtökin og segja frá alþjóðasamtökum sem þau eru aðilar að, en þau samtök hafa starfað mikið með konum frá Austur-Evrópu, þar sem vændisiðnaðurinn hefur haft sterk ítök, og samið réttindaskjal um kynheilbrigði.

Fræðslufundur í Neskirkju

Sunnudaginn 7. nóvember kl. 20 heldur Jón Sigurður Karlsson sálfræðingur fyrirlestur í safnaðarheimili Neskirkju sem hann kallar Vonir og vonbrigði. Þar mun hann ræða viðfangsefni fólks á ólíkum aldursskeiðum, vonir þess og vonbrigði. Hverjar eru vonir þínar? Hafa þær ræst? Hvað gerir þú þegar vonir og draumar rætast ekki? Hvernig er hægt að vinna úr vonbrigðum á uppbyggilegan hátt og sigrast á kringumstæðum? Þetta er viðfangsefni sem flest ef ekki allt fólk glímir við einhvern tíma á lífsleiðinni. Að loknum fyrirlestri verða umræður og fyrirspurnir yfir kaffi og léttum veitingum. Undanfarna vetur hafa fræðslukvöld verið haldin með reglubundnum hætti í Neskirkju og hefur myndast áhugasamur hópur í sókninni sem vill skoða og ræða ýmis mál sem tengjast fjölskyldulífi, hjónabandi og verkefnum daglegs lífs í síbreytilegu þjóðfélagi. Samræðan er mikilvægt tæki til eflingar almennri menntun og innsæi. Saman erum við sterkari en ein á báti og því eru öll sem áhuga hafa hvött til að koma í safnaðarheimili Neskirkju umrætt kvöld. Þú ert mikilvægur hlekkur og reynsla þín er dýrmæt. Samræðan skilar okkur lengra en þögnin. Vertu velkominn.