Fáránleg kjör NÚ er algjörlega gengið fram af fólki. Eins og allir vita þá hækkuðu laun þingmanna og ráðherra eftir kosningar, meira en nokkurn tímann gæti gerst í kjarasamningum almennings. Þrátt fyrir að þeir fái dagpeninga á sumrin, risnu og styrki.

Fáránleg kjör

NÚ er algjörlega gengið fram af fólki. Eins og allir vita þá hækkuðu laun þingmanna og ráðherra eftir kosningar, meira en nokkurn tímann gæti gerst í kjarasamningum almennings. Þrátt fyrir að þeir fái dagpeninga á sumrin, risnu og styrki.

Ég var að tala við konu hjá Tryggingastofnun ríkisins og hún sagði mér að hjón á bótum mættu ekki hafa hærri tekjur samanlagt en u.þ.b. 41.000 kr. eða u.þ.b. 20.000 kr. hvort fyrir sig, til að tekjurnar þeirra skertust ekki. Sem sagt, ef þær fara upp fyrir u.þ.b. 41.000 kr. þá verður tekjuskerðing.

Ég taldi konuna vera að grínast og þetta væri ekki raunhæft, ég taldi að enginn gæti farið að semja slíkt. En hún sagðist hafa þetta skrifað fyrir framan sig og að hinir háu herrar á þinginu hefðu ákveðið þetta. Ég sagði henni að það væri eins og að henda mat fyrir hunda, samanber þessa fáránlegu lágu upphæð, en samt staðfesti hún þetta.

Ég spyr, hvernig voga þeir sér að bjóða fólki upp á þessi fáránlegu kjör? Það er augljóst að þeir telja sig ekki þurfa að bera virðingu fyrir lífskjörum fólks almennt. Þessa svívirðingu á ekki að umbera. Þessir þingmenn virðast hafa fordóma gagnvart veiku fólki og þetta á að kæra til mannréttindaráðs. Þessum mönnum þarf að segja upp störfum vegna grimmdar og ómennsks hugarfars í garð almennings. Ingibjörg tryggingaráðherra er varla ein í ráðum.

Ef fólki er ekki nú orðið ljóst hvernig hugarfar stjórnmálamanna í garð almennings er, þá eru allir sem blindir kettlingar. Hér sést það augljóslega að þeir telja fólk ekki mega njóta svipaðra kjara og þeir sjálfir telja sig hafa rétt á og eru með skítkast á fólk í bókstaflegum skilningi. Það þarf að reka þetta fólk úr stjórn vegna skorts á mannlegu siðferði. Á þessum málum á að taka strax.

Fólk í öðrum löndum hefur deilt á sína opinberu ríkisstarfsmenn og fólk hér á einnig að sýna dug, en ekki vera eins og sofandi sauðir þegar þessi málefni spretta upp hérlendis.

Virðingarfyllst,

Katrín Halldórsdóttir,

Bústaðabletti 10, Rvík.

Augnsjúkdómur?

SIGRÍÐUR hafði samband við Velvakanda og vildi hún fá að vita hvers konar augnsjúkdómur hrjáði landsmenn. Sagðist hún hafa tekið eftir að margir þeir sem fram kæmu í sjónvarpi blikkuðu mikið augunum og var hún að velta því fyrir sér hvort þetta væri sjúkdómur. Eins vildi Sigríður fá að vita hverjir stjórnuðu leiðakerfi SVR, þar væri alltaf verið að breyta númerum vagnanna og sagði hún það til mikilla óþæginda fyrir fólk.

Keflavíkurvegur

RANNVEIG hafði samband við Velvakanda og langaði að koma með smáábendingu vegna Keflavíkurvegarins. Fyrir stuttu lokaðist vegurinn í tvo tíma vegna slyss. Það komst enginn leiðar sinnar á þessum tíma. Hvað ef það yrði nú slys á veginum og stórslys á flugvellinum í Keflavík? Hvorki sjúkrabílar né aðrir kæmust á slysstað. Er ekki orðið tímabært að gera eitthvað í málunum og breikka veginn þannig að fólk kæmist leiðar sinnar þótt eitthvað kæmi upp á.

Ofsóknir gegn köttum

ÉG er mikið á móti þessum ofsóknum sem kettir hafa orðið fyrir að undanförnu. Ég á sjálf kött og ég kvíði því að þurfa að halda honum inni á meðan á þessum aðgerðum stendur. Mér finnst þetta vera mikil frekja og þetta varðar við lög og stjórnarskrá Íslands. Það má alls ekki líta á ketti sem annars flokks.

Dýravinur.

Svört hliðartaska týndist

SVÖRT hliðartaska týndist laugardagskvöldið 29. janúar sl. í miðbæ Reykjavíkur. Skilvís finnandi er vinsamlegast beðinn að hafa samband við Arnar í síma 694-5010.

Nokia í fánalitunum

GSM-sími af gerðinni Nokia 5110 málaður í íslensku fánalitunum týndist í miðbæ Reykjavíkur fyrir um það bil hálfum mánuði. Upplýsingar í símum 555-3406 895-5582.

Golden/labrador tík vantar heimili

GOLDEN/labrador blönduð tík, tveggja ára gömul, óskar eftir góðu heimili. Hún hefur farið á hlýðninámskeið. Upplýsingar gefur Valgerður í síma 863-0893.

Kanínustrákur fæst gefins

KANÍNUSTRÁKUR fæst gefins á gott heimili. Upplýsingar gefur Helena í síma 551-6399.

Kettlingar fást gefins

ÞRÍR tveggja mánaða svartir og kassavanir kettlingar fást gefins á góð heimili. Upplýsingar í síma 554-1596.

Kisustelpur fást gefins

TVÆR níu vikna yndislegar kisustelpur fást gefins. Upplýsingar í síma 567-2499 og 897-2499.