14. mars 2000 | Fólk í fréttum | 1095 orð | 1 mynd

Sigursteinn Másson er umsjónarmaður þáttanna "Sex í Reykjavík"

Umdeild heimildamynd

Sigursteinn Másson: "Mér hefur fundist óskaplega gaman og spennandi að kíkja inn í heima sem eru ekki partur af mínu hversdagslega lífi. Sem hafa kannski opnað mér nýjar víddir og bætt í reynslusafnið.
Sigursteinn Másson: "Mér hefur fundist óskaplega gaman og spennandi að kíkja inn í heima sem eru ekki partur af mínu hversdagslega lífi. Sem hafa kannski opnað mér nýjar víddir og bætt í reynslusafnið.
Eitt algengasta umræðuefni Íslendinga í síðustu viku var eflaust fyrsti þáttur heimildamyndarinnar "Sex í Reykjavík" sem sýndur var á Stöð 2. Í kvöld er komið að öðrum þættinum og ætlar Birgir Örn Steinarsson að vera vel límdur við sjónvarpstækið. Hann sló á þráðinn til Sigursteins Mássonar, þáttagerðarmanns og fréttastjóra Skjás eins, og ræddi við hann um þættina.
"KVIKMYNDAFYRIRTÆKIÐ Hugsjón [framleiðandi þáttanna] fór þess á leit við mig að taka að mér umsjón þessara þátta," svarar Sigursteinn spurður um upphafið að gerð þáttanna. "Og tilefnið er í raun og veru, eins og svo margir hafa áttað sig á að framboð á hvers kyns klámefni hérlendis hefur aukist mjög. Það hefur gerst með Netinu, símaþjónustum og margvíslegum hætti og það hefur enginn tekið sig til og safnað saman þessum upplýsingum öllum og gert ástandsrannsókn eins og við erum að gera. Þannig að mér leist vel á hugmyndina og sló strax til."

Var ykkur brugðið yfir einhverju efni sem þið kynntust?

"Kannski já og nei. Þetta er í rauninni tvískipt. Ég hef séð um ákveðinn hluta þessarar dagskrárgerðar og hún Ragnheiður [Eiríksdóttir] hefur séð um aðra þætti. Af því sem ég kom að var fátt sem kom mér á óvart. Enda er það einhvern veginn þannig að þegar maður setur þetta allt saman í fjóra þætti, eins og í þessu tilviki, þá eru þetta svoldið stórir skammtar í einu. Það sem kom mér kannski mest á óvart var hve auðvelt það er að verða sér úti um íslenska vændisþjónustu í Reykjavík."

Hefur þú einhvern sérstakan áhuga á þessu viðfangsefni?

"Nei, ég hef engan sérstakan áhuga á þessu frekar en glæpum. Ég er fréttamaður, lít á mig sem rannsóknarfréttamann um leið, og þessvegna lít ég á þetta sem hvert annað verkefni."

Hvað fáum við að sjá?

Nú er einn þáttur búinn og þrír eftir, á hverju verður tekið í þeim?

"Við höldum áfram að skoða þennan kynlífsmarkað. Þetta verður kannski alvöruþrungnara eftir því sem lengra líður á þættina. Í næsta þætti skoðum við ýmis félög sem hafa verið stofnuð utanum kynlíf. Svo skyggnumst við á bak við tjöldin hjá símafyrirtæki og kynnumst því hvernig starfsemi þeim megin símalínunnar fer fram."

Finnst þér Ísland vera komið djúpt inn í þennan bransa?

"Ég held að á Íslandi sé boðið upp á flest það sem boðið er upp á í öðrum vestrænum löndum. Ég held að sú löggjöf sem á við í þessum efnum sé orðin úrelt, og það þurfi að stokka þessa hluti upp á nýtt. Ég held að það sé útilokað og fáránlegt að banna klámefni á Íslandi. Það er bara einhver "útópísk" hugsun sem þyrfti lögregluríki eins og Singapore til að framkvæma. Jafnvel þar viðgengst að sjálfsögðu klám. Ég held að menn verði bara að horfast í augu við það hvernig raunveruleikinn er, hver eftirspurnin er og setja raunhæfar reglur um þetta. Taka miklu harðar á því klámi sem beinist að fólki undir lögaldri en hugsa sig vel um hvað varðar boð og bönn í þessu sambandi."

Þið voruð ófeimnir við að sýna sýnishorn úr klámmyndum og öðru, var nauðsynlegt að ganga svona langt?

"Þetta efni sem við sýndum í fyrsta þættinum er efni sem er aðgengilegt fyrir alla sem eru átján ára og eldri á Íslandi. Alveg eins og farið er með myndavélar fara inn á skemmtistaði sem opnir eru átján ára og eldri þar sem jafnvel er drukkið fólk, þá sé ég ekkert athugavert við það að við speglum þetta ástand. Það hefur líka hrundið af stað umræðu og til hvers hún leiðir er eitthvað sem maður ekki veit á þessu stigi. Vonandi verður hún á vitrænum nótum og vonandi verður fólk í einhverju andlegu jafnvægi í þessari umræðu þegar það tekur ákvörðun, t.d. niðri á þingi, um hvernig brugðist verður við."

Viðbrögð áhorfenda

Eruð þið hræddir um að þið verðið kærðir af yfirvöldum?

"Nei, ég hef engar áhyggjur af því. Mér fyndist það fráleitt ef það myndi gerast árið 2000 að maður yrði kærður fyrir að segja frá hlutum eins og þeir eru og sýna hluti eins og þeir eru. Þá held ég að við sem samfélag værum komin ansi mikið út á hála braut. Við erum ekki að ýta undir erótík eða erótískar tilhneigingar með þessum þáttum. Þvert á móti þá erum við bara með kaldar staðreyndir."

Hafa ykkur borist einhverjar kvartanir yfir þessum fyrsta þætti?

"Nei, mér hafa ekki borist neinar kvartanir og ég veit ekki til þess að Hugsjón, sem framleiðir þessa þætti, hafi borist kvartanir. Kvartanirnar hafa trúlega flestar borist upp á Stöð 2 sem sýnir þættina og ber náttúrulega mesta ábyrgð á sýningu þeirra. Ég hef ekki orðið var við neitt annað en að fólk sé ánægt með það að það sé frætt um þessi málefni. Hversu aðgengilegt þetta sé á Netinu, á myndbandaleigum á bensínstöðvum og í bókabúðum. Síðan verða í raun aðrir að meta það, og taka ákvörðun um það, hvort þetta sé í lagi. Persónulega hef ég ekki almennilega myndað mér skoðun á því, aðrir verða að meta það, við erum bara að sýna hvernig ástandið er."

Býst þú við að þið munið hafa einhver áhrif á klámmarkaðinn á Íslandi með þessum þáttum?

"Ég veit það ekki. Mér finnst fyrstu viðbrögð benda til þess að það sé komin af stað umræða um það hvort þessir hlutir séu í lagi eða hvort það þurfi að setja reglur t.d. sem vernda betur börn. Ég held að menn ættu aðeins að setjast niður og ræða þetta í víðara samhengi. En ég held að aðgerðir eins og þær sem voru gerðar í Danmörku fyrir þrjátíu árum þjóni engum tilgangi. En þar reyndi lögreglan að koma af stað herferð í þeim tilgagni að uppræta klám. Ég held að þannig aðgerðir séu þá aðeins til þess að sýnast, láta líta svo út að lögreglan sé að gera eitthvað í málinu. Þeir verða kannski að gera það þegar kært er, en ég held að það þjóni afskaplega litlum tilgangi að vera með svona skyndiviðbrögð í sambandi við þetta. Þetta gerðist ekki í gær."

Hugsjón í heimildamyndagerð

Hugsjón vann Edduverðlaunin fyrir sakamálaþættina "Íslensk sakamál", eru einhverjar fleiri heimildamyndir í bígerð eftir þessa?

"Ekki í augnablikinu, ég er í meira en 100% starfi við að þjóna fréttastofunni hér á Skjá einum sem við ætlum að láta vaxa og verða stærri og sterkari. Þannig að ég hef engin áform um heimildamyndagerð eftir að þessari lýkur."

Þættirnir Íslensk sakamál og "Sex í Reykjavík" eiga það sameiginlegt að fjalla báðir um feimnismál í íslensku þjóðfélagi, er það einhver sérstakur stíll hjá framleiðandanum?

"Ég get nú ekki svarað fyrir Hugsjón. Ég hef náttúrulega gert nokkra heimildaþætti og fjallað um Geirfinnsmálið, fíkniefnamál, sakamál og svo þessa þætti núna. Ég hefði verið frekar lélegur í því að gera heimildaþátt um heiðagæsina eða öræfin. Það er einfaldlega vegna þess að það er mér mjög hulið og ég hef afskaplega lítinn áhuga á svona náttúrulífsefni, eins og flestar heimildamyndir á Íslandi fjalla um, en mér hefur fundist óskaplega gaman og spennandi að geta kíkt inn í heima sem eru ekki partur af mínu hversdagslega lífi. Sem hafa kannski opnað mér nýjar víddir og bætt í reynslusafnið."

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.