Sturla Böðvarsson og Ingvar Teitsson koma hornsteini í garðinn.
Sturla Böðvarsson og Ingvar Teitsson koma hornsteini í garðinn.
Mývatnssveit - Það var haldið hátíðlegt á dögunum að lokið er gerð varnargarðs sem ætlað er að verja Herðubreiðarlindir fyrir ágangi Jökulsár á Fjöllum.
Mývatnssveit - Það var haldið hátíðlegt á dögunum að lokið er gerð varnargarðs sem ætlað er að verja Herðubreiðarlindir fyrir ágangi Jökulsár á Fjöllum.

Samgönguráðherra, forseti Alþingis, oddviti Skútustaðahrepps og formaður Ferðafélags Akureyrar ásamt nokkrum öðrum gestum fóru að þessu tilefni í Lindar þar sem athöfn fór fram á varnargarðinum nýja.

Ingvar Teitsson, formaður Ferðafélags Akureyrar, flutti ræðu og rakti sögu varnargarða á þessum stað, en fyrst var hamlað gegn jökulfljótinu 1945 og var þar á ferðinni Páll Arason frá Þúfnavöllum ásamt fleiri Eyfirðingum. Þessi hópur vann "meirihlutann af degi" með handverkfærum við að byggja varnargarð. Í hópnum var meðal annarra Davíð skáld frá Fagraskógi. Hann orti þessa vísu um framkvæmdina:

Enginn vættur við þeim sá,

veg þeir ruddu um hraun og gjá.

Hentu grjóti í hyldjúp lág,

hlóðu stíflu í Jökulsá.

Mikið vatn í ánni

Annar garður var byggður 1957 og sópaði áin honum burt í flóði um 1975. Eftir það var byggður nýr og hærri garður. Undanfarin 20 ár hafa sífellt verið að koma hlaup, ekki síst í Kreppu, sem hafa valdið verulegum skemmdum á gróðri og mannvirkjum í Lindunum. Loks kom stóra hlaupið í Kreppu 1. ágúst 1999 og flæddi þá mjög mikið vatn út yfir Herðubreiðarlindir og spillti þar gróðri.

Í nóvember síðastliðinn fór Dyngjujökull að skríða fram. Þar með var ljóst að mun meira vatn en ella yrði í Jökulsá í sumar. Því var mjög brýnt að stórefla varnargarðinn til að vernda Herðubreiðarlindir. Ferðafélag Akureyrar beitti sér fyrir því að farið yrði í styrkingu varnargarðsins og naut þar til stuðnings margra aðila. Þar réð úrslitum stuðningur forseta Alþingis, Halldórs Blöndal, og þakkaði Ingvar Halldóri sérstaklega hans mikilvæga framlag í þessu máli. Einnig þakkaði hann samgönguráðherra fyrir stuðning hans, en ráðuneyti hans mun greiða kostnaðinn við gerð þessa varnargarðs.

Sturla Böðvarsson ávarpaði viðstadda og lét í ljós þá ósk að varnargarðurinn mætti duga vel um ókomin ár. Því næst lagði Sturla hornstein í garðinn með aðstoð Ingvars Teitssonar.

Að þessu loknu hélt hópurinn inn að Drekagili og þaðan í Öskju þar sem gengið var að Víti og Knebelsvörðu. Samgönguráðherra hafði ekki fyrr komið á þessar slóðir.