Í leik Rússa og Ítala á EM ungmenna voru spiluð þrjú grönd í suður á báðum borðum.

Í leik Rússa og Ítala á EM ungmenna voru spiluð þrjú grönd í suður á báðum borðum. Ítalski sagnhafinn fór tvo niður, en rússneska stúlkan Marina Kelina fékk níu slagi og sérstaka viðurkenningu fyrir handbragðið í mótsblaðinu fyrir "besta úrspil" keppninnar:

Vestur gefur; AV á hættu.

Norður
♠D8
♥ K102
♦ Á754
♣ G754
Vestur Austur
♠10743 ♠KG2
♥DG973 ♥84
♦D86 ♦K1093
♣8 ♣D1063
Suður
♠Á965
♥Á65
♦G2
♣ÁK92

Vestur Norður Austur Suður
Pass Pass 1 lauf 1 grand
Pass 3 grönd Pass Pass
Pass
Báðir sagnhafar fengu út hjartadrottningu, en sá ítalski hafði engar upplýsingar frá sögnum. Hann spilaði fyrst spaða á drottningu, en þegar það mistókst var ekki um annað að ræða en treysta á fjóra laufslagi. Hann tók því ÁK í laufi og fór fyrir vikið tvo niður.

Kelina taldi víst að austur ætti spaðakónginn og ákvað að vinna strax úr lauflitnum. Hún tók hjartadrottninguna heima með ás og svínaði strax hjartatíu. Fór síðan af stað með laufgosann. Austur lagði drottninguna á, Kelina drap og horfði vel og lengi á áttu vesturs. Síðan spilaði hún hjarta á kónginn og lauffjarka úr borði. Ítalinn Biondo lét þristinn án þess að depla auga, en Kelina var viss í sinni sök og setti tvistinn heima. Þar með átti hún fjóra slagi á lauf og níu í allt.

Daninn Martin Schaltz skrifaði um spilið í mótsblaðið og sagðist svo sem ekkert vera hissa á því að Biondo skyldi opna í þriðju hendi á níu punkta; það væri honum líkt, en hins vegar skildi hann ekki hvers vegna hann valdi ekki sterkari litinn - tígulinn!