Ætla að synda saman Viðeyjarsund um helgina

FYLKIR Sævarsson og Kristinn Magnússon, sundkappar, eru nú að undirbúa sig fyrir Viðeyjarsund um helgina. Þeir félagar ætla að stinga sér til sunds rétt fyrir neðan Viðeyjarstofu, annað hvort á laugardag eða sunnudag, og synda sem leið liggur til gömlu hafnarinnar í Reykjavík. Þessi leið er um það bil 2,7 kílómetra löng og er líklegt að hrollur færi um marga við tilhugsunina um að dýfa sér í ískaldan sjóinn. Fylkir og Kristinn verða í sundskýlunum einum fata á sundinu. "Aðalhættan er sú að við fáum kuldakrampa og það er nú ástæðan fyrir því að við æfum okkur vel fyrir sundið. En það er líka kuldinn sem við erum að sækja í," segir Fylkir.

Að öllum líkindum mun bátur frá björgunarsveitunum fylgja þeim félögum en að sögn Fylkis mun það þýða uppgjöf ef þeir fara um borð í bátinn. "Við munum hugsanlega stoppa til þess að drekka orkudrykk en við förum ekki um borð í bátinn," segir Fylkir. Þeir verða að innbyrða kolvetnisríka fæðu fyrir sundið og líka er mikilvægt að neyta fitu og drekka mikinn vökva að sögn Fylkis en vökvatapið verður mikið hjá þeim. "Það verður enginn sprettur á okkur, þetta er bara spurning um að þolið haldi," segir Fylkir.

Syntu ferjuleiðina í fyrra

Fylkir og Kristinn æfðu saman sund á sínum tíma en báðir eru þeir áhugasamir um sjósund og hafa áður stungið sér til sunds frá Viðey. "Í fyrra syntum við ferjuleiðina til Viðeyjar, fórum í land og kvittuðum í gestabókina og syntum svo út aftur. Leiðin er mun styttri en sú sem við syndum um helgina, eða um 1 og ½ kílómetri," segir Fylkir en að sögn hans hefur Kristinn synt hið eiginlega Viðeyjarsund áður. En af hverju eru þeir félagar að leggja í þetta sund saman? "Þetta er okkar áhugamál og svo höfum við líka svo gaman af hvor öðrum. Þetta er gott tækifæri til þess að gera eitthvað saman og miklu skemmtilegra heldur en að vera einn í þessu," segir Fylkir.