12. desember 2000 | Höfuðborgarsvæðið | 446 orð | 5 myndir

Fjöldi skoðaði jólatré og -sveina

Þúsundir Reykvíkinga voru á Austurvelli þar sem efnt var til skemmtunar um leið og kveikt var á perunum 456 á Óslóartrénu.
Þúsundir Reykvíkinga voru á Austurvelli þar sem efnt var til skemmtunar um leið og kveikt var á perunum 456 á Óslóartrénu.
[ Smellið til að sjá stærri mynd ]
JÓLASVEINAR hafa í mörgu að snúast þessa dagana enda mannfólkið nú byrjað að tendra ljós á jólatrjám á höfuðborgarsvæðinu.
JÓLASVEINAR hafa í mörgu að snúast þessa dagana enda mannfólkið nú byrjað að tendra ljós á jólatrjám á höfuðborgarsvæðinu. Troða þessir náungar gjarnan upp við slík tækifæri og er ekki óalgengt að sjálfir foreldrarnir, Grýla og Leppalúði, séu þar að auki með í för. Þegar ljós voru kveikt á jólatrjám í Hafnarfirði, Garðabæ, Kópavogi og á Austurvelli í Reykjavík um síðustu helgi, létu jólasveinarnir sig enda ekki vanta og kunnu frá ýmsu að segja.

Hafnfirðingar, Garðbæingar og Kópavogsbúar notuðu laugardaginn til þess að kveikja á ljósum trjáa sinna, en Reykvíkingar hins vegar sunnudaginn.

Tvö jólatré í Hafnarfirði

Í Hafnarfirði var kveikt á ljósum tveggja jólatrjáa í bænum. Var annað þeirra gjöf frá íbúum Cuxhaven í Þýskalandi en hitt frá íbúum Fredriksberg í Danmörku. Tréð frá Cuxhaven er við Flensborgarhöfn og þar hófst athöfnin með jólatónum Lúðrasveitar Hafnarfjarðar. Því næst flutti Helmut Heyne, yfirborgarstjóri Cuxhaven, kveðju og tendraði svo ljós trésins. Að loknum kórsöng og ávarpi fluttu leikskólabörn frá Garðavöllum nokkur lög. Athöfninni lauk með því að jólasveinn heilsaði upp á fólkið.

Tréð frá Fredriksberg er að þessu sinni við Hafnarfjarðarkirkju, en hefur jafnan staðið á Thorsplani. Athöfnin þar hófst sömuleiðis með tónum Lúðrasveitar Hafnarfjarðar. Þá flutti Michael Dal kveðju bæjar síns í Danmörku og tendraði ljósin. Eftir ávarp, hugvekju og kórsöng lauk athöfninni með heimsókn nokkurra jólakarla, mörgum til óblandinnar ánægju.

Síðan hófst jólaskrall í verslunarmiðstöðinni Firði kl. 15, með tilheyrandi uppákomum, og allan daginn voru líka syngjandi jól í Hafnarborg, þar sem fram komu 22 kórar og sönghópar, alls um 800 manns.

Garðabær og Kópavogur

Í Garðabæ voru ljós tendruð á jólatrénu á Garðatorgi kl. 15.45. Jólatréð er gjöf frá vinabæ Garðabæjar í Noregi, Asker, og var það norski sendiherrann á Íslandi, Kjell Halvorsen, sem afhenti það formlega. Laufey Jóhannsdóttir, forseti bæjarstjórnar, veitti trénu viðtöku. Blásarasveit Tónlistarskóla Garðabæjar lék jólalög, kór Hofsstaðaskóla söng og jólasveinar komu í heimsókn.

Jólatré Kópavogsbúa stendur framan við Hamraborg, og er það tré gjöf vinabæjar Kópavogs í Svíþjóð, Norrköping. Athöfnin hófst kl. 14.40 með jólatónum Skólahljómsveitar Kópavogs. Síðan flutti Hermann Aftrolle, sendiherra Svíþjóðar, ávarp og afhenti tréð með formlegum hætti. Forseti bæjarstjórnar, Ármann Kr. Ólafsson, veitti því viðtöku. Þá söng Kór Kársnesskóla jólalög og að síðustu komu jólasveinar um langan veg og glöddu ung hjörtu.

Reykjavík

Á Austurvelli voru ljós tendruð á jólatrénu sunnudag. Jólatréð er gjöf Óslóarbúa til Reykvíkinga og hafa þeir sýnt vinarþel með þessum hætti í 49 ár. Í ár eru 456 perur á trénu, sem er 11,9 metra hátt. Kjell Halvorsen, sendiherra, afhenti tréð, en Ingibjörg Sólrún Gísladóttir borgarstjóri þáði fyrir hönd Reykvíkinga. Að þessu sinni var athöfnin haldin sameiginlega af Reykjavík - menningarborg og Reykjavíkurborg. Var athöfnin því en áður hefur verið og mætti fjölmenni til að fylgjast með tendrun ljósa og skemmtiatriðum.

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.