13. febrúar 2001 | Höfuðborgarsvæðið | 286 orð | 1 mynd

Framkvæmdir til að bæta íþróttaaðstöðuna í Smáranum í Kópavogi hefjast í sumar

Nýtt knattspyrnuhús tekið í notkun um áramótin

Auk þess að nýtast undir æfingar og kappleiki, mun nýtt knattspyrnuhús í Kópavogi nýtast við sýningarhald og ýmislegt annað.
Auk þess að nýtast undir æfingar og kappleiki, mun nýtt knattspyrnuhús í Kópavogi nýtast við sýningarhald og ýmislegt annað.
BÆJARYFIRVÖLD í Kópavogi stefna að því að taka nýtt knattspyrnuhús á íþróttasvæðinu í Smáranum í notkun um næstu áramót.
BÆJARYFIRVÖLD í Kópavogi stefna að því að taka nýtt knattspyrnuhús á íþróttasvæðinu í Smáranum í notkun um næstu áramót. Steingrímur Hauksson, deildarstjóri hönnunardeildar Kópavogsbæjar, sagði að verið væri að undirbúa alútboð og að samkvæmt því væri ráðgert að hefja framkvæmdir í sumaren áætlaður kostnaður er um 350 til 400 milljónir króna.

"Húsið verður fyrst og fremst nýtt sem æfingahús," sagði Steingrímur. "Það verður hins vegar mögulegt að halda þar minni keppnir."

Í Smáranum er þegar gervigrasvöllur, íþróttahús, grasæfingasvæði og keppnisvöllur. Steingrímur sagði að knattspyrnuhúsið yrði reist yfir núverandi gervigras og að þegar byggingu þess yrði lokið yrði nýtt gervigras lagt en núverandi gervigras er frekar illa farið.

Knattspyrnuhúsið verður tengt íþróttahúsinu

Þar sem um alútboð er að ræða verða bæði hönnun og framkvæmdir við húsið í höndum tilboðsgjafanna. Steingrímur sagði að ekki væri búið að taka ákvörðun um rekstrarformið en húsið verður alfarið í eigu Kópavogsbæjar enda ekki um einkaframkvæmd að ræða líkt og t.d. í Reykjanesbæ þegar Reykjaneshöllin var byggð.

Steingrímur sagði að gervigrasvöllurinn væri 68x105 metrar að stærð og að húsið, sem byggt yrði yfir hann, yrði því um 75x115 metrar. Hann sagði að lofthæðin yrði 12,5 metrar við miðju en um 6 metrar við hliðarlínurnar.

Húsið einnig nýtt undir sýningar

Ekki verður byggð sérstök búningsaðstaða við nýja húsið heldur verður sú aðstaða sem fyrir er í íþróttahúsinu nýtt. Gert er ráð fyrir að knattspyrnuhúsið verði tengt íþróttahúsinu með sérstakri tengibyggingu en Steingrímur sagði að útfærslan yrði alfarið í höndum tilboðsgjafanna.

Auk þess að nýta húsið fyrir knattspyrnuæfingar og leiki hyggjast bæjaryfirvöld í Kópavogi nýta það undir ýmislegt annað, eins og t.d. sýningar. Stóra sjávarútvegssýningin er m.a. haldin í bænum á þriggja ára fresti og er næst haustið 2002 og því ætti húsið að koma að góðum notum þá.

Fletta í greinum frá þessum degi

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.