Sérsveit júgóslavnesku lögreglunnar ræðst inn í hús Slobodans Milosevic í Belgrad í fyrrinótt.
Sérsveit júgóslavnesku lögreglunnar ræðst inn í hús Slobodans Milosevic í Belgrad í fyrrinótt.
[ Smellið til að sjá stærri mynd ]
SLOBODAN Milosevic, fyrrverandi forseti Júgóslavíu, virðist eiga sér færri stuðningsmenn en hann taldi.

SLOBODAN Milosevic, fyrrverandi forseti Júgóslavíu, virðist eiga sér færri stuðningsmenn en hann taldi. Umsátursástand var í gær við forsetabústaðinn í Dodinje-hverfinu í Belgrad, þar sem Milosevic heldur sig, en sérsveit lögreglu gerði í fyrrinótt misheppnaða tilraun til inngöngu í húsið.

Zoran Djindjic, forsætisráðherra Serbíu, sagði í gær að ætlunin hefði ekki verið að handtaka Milosevic, heldur afhenda honum stefnu til að mæta fyrir rannsóknardómara í Serbíu, en hann er sakaður um glæpi gegn þjóð sinni.

Nokkur fjöldi fólks safnaðist að forsetabústaðnum til að sýna Milosevic stuðning en lögregla sló í gærmorgun hring um húsið og rak mótmælendur á brott. Lítill hópur hélt að húsinu að nýju um hádegi í gær og gerði hróp að lögreglu.

Ekki gætir mikillar spennu í Belgrad þrátt fyrir atburði næturinnar en áhlaupið á forsetabústaðinn var gert um tvöleytið í fyrrinótt. Hópur sérsveitar lögreglunnar réðst til inngöngu en var mætt með byssuskotum. Særðust tveir lögreglumenn og ljósmyndari en ekki alvarlega.

Djindjic forsætisráðherra sagði í gær að þrjár ástæður hefðu verið fyrir áhlaupinu, ætlunin hefði ekki verið að handtaka Milosevic. Átt hefði að færa honum stefnu en serbneski ríkissaksóknarinn hefur fallist á málshöfðun á hendur Milosevic fyrir glæpi gegn þjóðinni. Þá hefði verið ætlunin að fækka lífvörðum Milosevic en þingið samþykkti á föstudag ný lög sem minnka réttindi forsetans fyrrverandi. M.a. hefur hann nú aðeins rétt á einum lífverði auk þess sem yfirstjórn þeirra færist frá her yfir til lögreglu. Í þriðja lagi hugðust lögreglumenn kanna ásakanir þess efnis að mikið magn vopna og sprengiefna væri að finna innandyra.

Samkvæmt samþykkt þingsins býr Milosevic í óleyfi í forsetabústaðnum auk þess sem hann á ekki rétt á lífvörðunum 78 sem gæta hans. Milosevic hefur hins vegar beðið um fimmtán menn til að vera persónulegir lífverðir, auk hluta lífvarðahópsins sem gætir hans.

Óljóst er hversu margir menn eru innandyra en Mira Markovic, eiginkona Milosevic, og dóttir þeirra eru með forsetanum. Aðspurður sagði Dusan Mihhajlovic, innanríkisráðherra Serbíu, að forsetinn fyrrverandi væri í stofufangelsi. Engar sakir hafa hins vegar verið bornar á eiginkonu hans.

Kveðst ekki fara lifandi í fangelsi

Á milli 1:30 og 2 í fyrrinótt réðust sérsveitir til árásar en hröktust frá vegna skothríðar. Síðar komst einn lögreglumaður inn en hann segir Milosevic hafa neitað að taka við stefnunni og lýst því yfir að hann "færi aldrei lifandi í fangelsi". Þá var haft eftir lögreglumanninum að hluti þess hóps sem hefur öryggi Milosevic með höndum hefði verið drukkinn og látið ófriðlega.

Lögreglumaðurinn upplýsti Milosevic um efni ákærunnar þar sem fram er tekið að hann verði ekki framseldur til stríðsglæpadómstólsins í Haag. Sagði innanríkisráðherrann að gæfi forsetinn fyrrverandi sig ekki sjálfviljugur fram við rannsóknardómara, yrði ráðist inn með valdi; um leið og herinn teldi sig reiðubúinn til þess.

Djindjic og Mihajlovic, lögðu báðir á það áherslu í gær að um fullkomlega löglega aðgerð hefði verið að ræða. Sagði Djindjic að Vojislav Kostunica, forseti Júgóslavíu, hefði verið látinn vita af árásinni og að hann hefði ekki lagst gegn henni.

Yfirmanni hersins vikið frá?

Mihajlovic sakaði einstaka foringja í júgóslavneska hernum um að hafa slegið vörð um Milosevic og Kostunica forseti skipaði þeim að fara þegar í stað út úr húsinu. Innanríkisráðherrann sagði að enn væri óljóst hver hefði gefið út skipunina um að óhlýðnast.

Er talið að mál þetta kunni að kosta yfirmann hersins, Nebosja Pavkovic, embættið. Þá ýjuðu forsætisráðherrann og innanríkisráðherrann að því að fleiri kynnu að verða ákærðir fyrir sömu brot og Milosevic.

Belgrad. Morgunblaðið.