Valgerður Sverrisdóttir afhenti Jóni Þór Ólafssyni, verkfræðingi hjá Marel, viðurkenninguna.
Valgerður Sverrisdóttir afhenti Jóni Þór Ólafssyni, verkfræðingi hjá Marel, viðurkenninguna.
Á IÐNÞINGI var Jóni Þór Ólafssyni, verkfræðingi hjá Marel, veitt viðurkenning úr Verðlaunasjóði iðnaðarins fyrir framúrskarandi verkfræði- og tæknistörf á sviði iðnaðar.

Á IÐNÞINGI var Jóni Þór Ólafssyni, verkfræðingi hjá Marel, veitt viðurkenning úr Verðlaunasjóði iðnaðarins fyrir framúrskarandi verkfræði- og tæknistörf á sviði iðnaðar.

Valgerður Sverrisdóttir iðnaðar-og viðskiptaráðherra afhenti verðlaunahafanum viðurkenninguna. Í umsögn stjórnar Verðlaunasjóðsins segir m.a.:

"Jón Þór hefur átt ríkan þátt í að byggja upp hátækniiðnað tengdan matavælaiðnaði á Íslandi. Hann hefur með hugmyndaauðgi sinni og störfum lagt mikið af mörkum í þeirri þróun sem átt hefur sér stað undanfarna tvo áratugi.

Hann hefur unnið hjá Marel hf. frá stofnun fyrirtækisins árið 1983 og hefur verið lykilmaður í allri vöruþróun þess allt frá því að fyrstu hugmyndirnar um að nýta tölvutæknina í þágu íslenskrar fiskvinnslu urðu til í lok 8. áratugarins. Jón Þór vann við þær hugmyndir strax á námsárum sínum í verkfræði og á Raunvísindastofnun Háskóla Íslands að námi loknu.

Jón Þór er einstaklega hugmyndaríkur maður sem fer oft óhefðbundnar leiðir þegar finna þarf nýjar lausnir. Hann hefur verið sífrjór í hugsun og hönnun um tveggja áratuga skeið.

Fordæmi Jóns Þórs er virðingarvert og hvatning fyrir annað tæknifólk sem starfar í iðnaði og nemendur sem stunda eða stefna á tækninám. Fyrir það veitir Verðlaunasjóður iðnaðarins honum viðurkenningu sína."

Við þetta tækifæri nefndi iðnaðarráðherra m.a. sem dæmi að Jón Þór hefði verið einn helsti hugmyndasmiðurinn að Marel-skipavoginni, sem var burðarásinn í tekjum fyrirtækisins í upphafi 10. áratugarins og gerði því mögulegt á þeim árum að halda uppi öflugu vöruþróunar- og markaðsstarfi auk fjölda annarra nýjunga í framleiðslu Marels, sem hann hefði átt ríka hlutdeild í að þróa ásamt samstarfsfólki sínu.

Verðlaunasjóðurinn var stofnaður árið 1976 af Kristjáni Friðrikssyni í Últíma og konu hans Oddnýju Ólafsdóttur. Kristján hafði óbilandi trú á íslenskum iðnaði og íslenskri hönnun og fannst aldrei nógsamlega vakin athygli á hinum fjölmörgu íslensku uppfinningamönnum. Stofnfé Verðlaunasjóðs iðnaðarins var húseign sem Últíma gaf og skyldi ágóðinn af eigninni verða verðlaunafé.

Verðlaunasjóðurinn hefur starfað í anda stofnenda hans í samstarfi við samtök í iðnaði og hefur með vissu árabili veitt viðurkenningar - oftast fyrir frumkvöðulsstarf á sviði iðnaðar. Samkvæmt upphaflegri stofnskrá sjóðsins er tilgangur hans að örva til dáða á sviði iðnaðar og jafnframt vekja athygli á þeim afrekum sem unnin hafa verið á því sviði.

Verðlaun sjóðsins eru, auk veglegrar fjárhæðar, sérstakur verðlaunagripur og verðlaunaskjal, bæði í skinnbandi og innrammað. Verðlaunagripurinn heitir Hjólið og er tákn mannsins fyrir uppgötvun, framfarir og virkni.