HREPPSNEFND Vatnsleysustrandarhrepps hefur falið sveitarstjóra að senda eftirlitsnefnd með fjármálum sveitarfélaga þau gögn sem nefndin óskaði eftir. Eftirlitsnefndin taldi ljóst að fjárhagsstaða sveitarsjóðs Vatnsleysustrandarhrepps væri fremur...

HREPPSNEFND Vatnsleysustrandarhrepps hefur falið sveitarstjóra að senda eftirlitsnefnd með fjármálum sveitarfélaga þau gögn sem nefndin óskaði eftir.

Eftirlitsnefndin taldi ljóst að fjárhagsstaða sveitarsjóðs Vatnsleysustrandarhrepps væri fremur alvarleg. Hún benti sérstaklega á miklar skuldir sveitarsjóðs sem námu í árslok 2000 liðlega 421 þúsund kr. á íbúa og peningaleg staða neikvæð um 343 þúsund kr. á mann. Þá var bent á að fjárfestingarútgjöld hefðu á árinu 2000 numið um það bil fimmfaldri framlegð ársins.

Skuldirnar lækka um 140 milljónir á næstu árum

Í bókun hreppsnefndar, þar sem erindi nefndarinnar var tekið fyrir, er þess látið getið að samkvæmt fjögurra ára fjárhagsáætlun muni skuldir sveitarfélagsins lækka um 140 milljónir á næstu árum.

Jóhanna Reynisdóttir sveitarstjóri Vatnsleysustrandarhrepps segir að þegar ákveðið var að fara út í markaðsátak til að stækka byggðina og fjölga íbúum hafi legið fyrir að skuldirnar myndu aukast tímabundið. Útlit sé fyrir að skuldirnar verði aftur komnar í landsmeðaltal á árinu 2005.