Fiskverðsdeila ÚA og sjómanna á ísfisktogurum: Sjómenn krefjast 33% hækkunar frá 30% heimalöndunarálagi ÚA býður fiskmarkaðsverð fyrir 10% aflans SJÓMENN á ísfisktogurum Útgerðarfélags Akureyringa hf. vilja fá 107,25 krónur fyrir kílóið af þriggja kílóa...

Fiskverðsdeila ÚA og sjómanna á ísfisktogurum: Sjómenn krefjast 33% hækkunar frá 30% heimalöndunarálagi ÚA býður fiskmarkaðsverð fyrir 10% aflans

SJÓMENN á ísfisktogurum Útgerðarfélags Akureyringa hf. vilja fá 107,25 krónur fyrir kílóið af þriggja kílóa þorski og þyngri, 82,07 krónur fyrir kílóið af þorski undir þrem kílóum og 65,94 krónur fyrir kílóið af undirmálsþorski. ÚA hefur hins vegar boðist til að greiða sjómönnunum fiskmarkaðsverð fyrir 10% af aflanum en 40% heimalöndunarálag á 90% aflans. ÚA hafði samþykkt að hækka heimalöndunarálagið úr 30% í 40% frá síðustu mánaðamótum. Samkvæmt heimildum Morgunblaðsins þýða kröfur sjómannanna 33% hækkun frá 30% heimalöndunarálaginu en tilboð ÚA jafngildir um 43% heimalöndunarálagi.

Sjómenn á ísfisktogurum ÚA og togaranum Kolbeinsey ÞH frá Húsavík hafa sagt upp störfum vegna óánægju með fiskverð. Þessir togarar eru nú allir í höfn, nema Kaldbakur og Hrímbakur, sem voru að veiðum á Deildargrunni í gær. Svalbakur er að koma úr slipp á Akureyri og gamli Sólbakur kom til Akureyrar í gær. Harðbakur átti að fara á veiðar á þriðjudagskvöld en þar sem ósamið er um fiskverðið fór hann ekki út. Kolbeinsey ÞH kom úr siglingu á þriðjudag og átti að fara á veiðar á morgun.

Sjómenn á Kolbeinsey ÞH sögðu upp störfum á föstudag en undirmennirnir eru með einnar viku uppsagnarfrest. Sjómennirnir vildu upphaflega fá 45% heimalöndunarálag en Fiskiðjusamlag Húsavíkur hf. hækkaði heimalöndunarálagið úr 30% í 40% frá síðustu mánaðamótum. Nú vilja sjómennirnir fá rúmlega 40% heimalöndunarálag frá áramótum en Fiskiðjusamlag Húsavíkur hf. hefur einungis samþykkt að fiskverðshækkunin gildi frá og með næstu veiðiferð skipsins, að sögn Kára Arnórs Kárasonar framkvæmdastjóra Verkalýðsfélags Húsavíkur.

Hugsanlegt að Kolbeinsey ÞH

semji öðruvísi en ÚA­togarar

"Fiskiðjusamlagið hefur ekki teygt sig upp í 45% og við höfum ekki teygt okkur niður í 40% álag," segir Kári Arnór. Hann segir að ekki sé útilokað að sjómenn á Kolbeinsey ÞH semji á öðrum nótum en sjómenn á togurum ÚA. "Kolbeinsey ÞH var með 2,1 kílóa þorsk að meðaltali í fyrra og þá var hásetahluturinn á skipinu 2,5-2,6 milljónir króna. Ísfisktogarar ÚA eru með mjög svipaða meðalvigt en hásetahluturinn á þeim var að meðaltali 1,8 milljónir í fyrra."

Heimalöndunarálag togara Útgerðarfélags Dalvíkinga hf., Björgvins EA og Björgúlfs EA, hækkaði úr 30% í 40% frá síðustu mánaðamótum, að sögn Vigfúsar Jóhannessonar skipstjóra á Björgvin EA. Björgvin EA kemur inn á þriðjudag en Björgúlfur EA átti að koma úr slipp á Akureyri í gærkvöldi.

Vigfús segir að öllum afla ísfisktogara ÚA hafi verið landað á Akureyri og þeir fái lægsta fiskverð á landinu. "Það fá allir sama heimalöndunarálag og sjómennirnir hjá ÚA semja um, þannig að þeir fá alltaf lægsta fiskverðið. Því væri skynsamlegast að ÚA tengdi að minnsta kosti hluta af fiskverðinu við fiskmarkaðsverð. Dalvíkurtogararnir veiða miklu meira af þorski en ÚA-togararnir, þannig að við fáum miklu hærra verð en þeir. Hins vegar höfum við einungis von á einni siglingu í ár, þar sem verið er að hegna okkur fyrir að hafa farið í fáar siglingar."

Súlnafell EA með sérstakan

bónus fyrir þorsk og ýsu

Heimalöndunarálag Súlnafells EA hækkaði einnig úr 30% í 40% frá síðustu mánaðamótum, að sögn Guðmundar Kristjánssonar skipstjóra. Súlnafell EA er í eigu KEA og landar í Hrísey. Skipið hefur verið á veiðum á Deildargrunni en kemur til hafnar á morgun.

Guðmundur segir að öllum afla Súlnafells EA hafi verið landað heima en Björgvin EA og Björgúlfur EA hafi farið í siglingar og sent út ísfisk í gámum. "Vegna þessa sömdum við nýlega um bónus á þorsk og ýsu, sem er sú krónutala sem hálft kíló vegur í Verðlagsráðsverði, þannig að við fáum greitt fyrir tveggja kílóa þorsk eins og hann væri tvö og hálft kíló. Þessi upphæð gæti numið um 200 þúsund krónum hjá háseta yfir árið."

Guðmundur segist vonast til áhöfnin á Súlnafelli EA fái sömu kjör og sjómennirnir á ísfisktogurum ÚA muni semja um. Hins vegar náist aldrei friður um fiskverð fyrr en búið sé að tengja allt fiskverð í landinu við fiskmarkaðsverð. "Nú eru 20-30 fiskverð í gangi í landinu og það er ansi súrt að þeir, sem landa á fiskmörkuðum fái þrisvar sinnum hærra verð en við," segir Guðmundur. Hann segir að hægt væri að skylda menn til að selja allan afla á fiskmörkuðum og fyrirtæki gætu þess vegna keypt afla af eigin skipum, eins og Grandi hf. geri til dæmis.

Sævar Frímannsson, formaður verkalýðsfélagsins Einingar, segir að Eining hafi ekki farið fram á viðræður um hækkun á launum fiskverkafólks ef sjómenn á ísfisktogurum ÚA fái hækkun á fiskverði núna. Félagssvæði Einingar nær yfir Eyjafjarðarsvæðið.

"Við erum með fasta og bundna samninga til 15. september næstkomandi og það er engin kröfugerð í gangi hjá okkur. Mér finnst hins vegar persónulega að ef eitthvert fyrirtæki hækkar laun sjómanna sinna vegna góðrar afkomu ætti fiskverkafólk fyrirtækisins einnig að njóta hennar. Ég er alls ekki að blanda þessu saman við kröfur sjómanna ÚA en þeir hafa verið með lægri laun en aðrir sjómenn á landinu. Mér finnst það hins vegar vera réttlætismál að fiskverkafólk fái að njóta góðrar afkomu fyrirtækja. Fiskverkafólk er með lág laun og því vetir ekki af launahækkun," segir Sævar Frímannsson.

Fiskverkafólk vill við­

ræður ef sjómenn fá hækkun

Fiskverkafólk í frystihúsi og saltfiskverkun KEA á Dalvík vill viðræður um að það fái sérstaka kauphækkun ef samið verður við sjómenn á Eyjafjarðarsvæðinu um frekari fiskverðshækkanir á næstunni, að sögn Arnfríðar Valdimarsdóttur trúnaðarmanns í frystihúsi KEA á Dalvík. "Við söfnuðum undirskriftum um 80 manns í frystihúsinu og saltfiskverkuninni til að minna á að við værum líka til."

Arnfríður segir að verkalýðsfélög tengist ekki þessari undirskriftasöfnun, enda gildi kjarasamningar verkalýðsfélagsins Einingar til 15. september næstkomandi. Hún segir að hins vegar hljóti fyrirtæki, sem hafi efni á að hækka laun sjómanna, einnig að hafa efni á að hækka laun fiskverkafólks.

Morgunblaðið/Rúnar Þór

Tveir af ísfisktogurum ÚA, Harðbakur EA og gamli Sólbakur EA, í höfn á Akureyri í gær.

Kjararáð sjómanna á ísfisktogurum ÚA á fundi í gær.