MORGUNBLAÐINU hefur borist eftirfarandi tilkynning frá kínverska sendiráðinu: "Fyrst af öllu: Falun Gong er illskeyttur sértrúarhópur. Þetta er ekki einföld heilsuræktarstefna.

MORGUNBLAÐINU hefur borist eftirfarandi tilkynning frá kínverska sendiráðinu:

"Fyrst af öllu: Falun Gong er illskeyttur sértrúarhópur. Þetta er ekki einföld heilsuræktarstefna. Upphafsmaður hreyfingarinnar telur sig geta bjargað heiminum frá "dómsdegi".

Hann telur sig vera meiri mann en Lao Zi, Búdda og Jesú. Kenning Falun Gong segir að sá sem veikist sé ekki kominn á nægilega hátt stig í tilverunni. Afskipti lækna muni koma í veg fyrir að þeir komist til himna. Fjölmargir hafa látist vegna þess að þeir leita ekki læknis þegar nauðsyn ber til. Þeir telja að eftir æfingar sínar sé engin þörf á nokkurri læknisaðstoð. Vitað er að 1.660 Falun Gong-áhangendur hafa látist vegna þess að þeir neituðu að þiggja læknisaðstoð.

Í öðru lagi: Það sem sagt hefur verið um Falun Gong undanfarið er ekki rétt. Æfingar þeirra eru einungis 10 ára gamlar. Þær fylgja ekki gamalli hefð. Enginn kínverskur bardagalistamaður Qi Gong myndi samþykkja að Falun Gong sé Tai Ji eða Qi Gong. Æfingar þeirra eru fengnar úr ýmsum áttum. Þessar æfingar hafa valdið þeim, sem stunda þær, ýmsum vandræðum. Vitað er að það fólk sem hefur verið kristinnar trúar áður en það kynntist Falun Gong-hreyfingunni, brenndi biblíuna til að sýna fram á að það væri félagar í Falun Gong.

Í þriðja lagi: Margir áhangendur Falun Gong hafa svipt sig lífi, orðið geðveikir og hafa orðið fjölskyldu sinni, vinum og öðrum að meini. Ástæða þess er sú að þeim er ógnað af dómsdagskenningu og eyðileggingu jarðarinnar.

Í fjórða lagi: Falun Gong-áhangendur fylgja flestir kenningum samtakanna af ofstæki. Þeir dýrka stofnandann, hlýða í einu og öllu orðum hans og myndu fylgja honum í dauðann.

Ef leiðtoginn segir þeim að "fara út og fullkomnast" þá hafa sumir þeirra kveikt í sér á opinberum stöðum og látist af sárum sínum. Þeir telja sig með þessu komast á æðra tilverustig. Og þegar hann segir þeim að senda frá sér strauma um kenninguna til þeirra sem nærstaddir eru þá reyna áhangendurnir að komast nærri hátt settum þjóðarleiðtogum Kínverja og kalla til þeirra ókvæðisorð.

Í fimmta lagi: Þegar Falun Gong var bannað í Kína hættu þær rúmlega tvær milljónir manna, sem fylgdu hreyfingunni, æfingum og tóku upp aðrar æfingar sem teljast heilbrigðar. Einungis örfáir harðir áhangendur voru færðir til dómstóla með löglegum hætti. Tekist hefur að hjálpa mörgum þeirra til að snúa frá villu vegar til heilbrigðs lífs."