Hádegisverðarfundur Sænsk-íslenska verslunarráðsins föstudaginn 11. apríl kl. 12-13.45, á Radisson SAS Hótel Sögu, Skála. Í tengslum við aðalfund Sænsk-íslenska verslunarráðsins verður opinn fundur um evrukosningar sem fram fara í Svíþjóð á haustdögum.
Hádegisverðarfundur Sænsk-íslenska verslunarráðsins föstudaginn 11. apríl kl. 12-13.45, á Radisson SAS Hótel Sögu, Skála. Í tengslum við aðalfund Sænsk-íslenska verslunarráðsins verður opinn fundur um evrukosningar sem fram fara í Svíþjóð á haustdögum. Gestur fundarins og framsögumaður verður Sören Holmberg, prófessor við stjórnmálafræðideild Gautaborgarháskóla. Fundurinn er öllum opinn. Hádegisverður er í boði SÍV fyrir félaga en kostar kr. 1.500 fyrir aðra.

Ráðstefna um frumkvöðlamenntun í framhaldsskóla verður haldin í Nýheimum á Hornafirði, fimmtudaginn 10. apríl kl. 9.30-17.30. Tilgangur ráðstefnunnar er að ræða hvernig eigi að innleiða frumkvöðlamenntun í framhaldsskóla á Íslandi. Örn Daníel Jónsson, prófessor í frumkvöðlafræði við Háskóla Íslands, setur ráðstefnuna. Erindi halda m.a.: G. Ágúst Pétursson, verkefnisstjóri Nýsköpunar 2003, Ingibjörg Zophoníasdóttir og Sigrún Inga Sigurgeirsdóttir, nemendur í Framhaldsskólanum í Austur-Skaftafellssýslu, Eyjólfur Guðmundsson skólameistari o.fl. Ráðstefnan er haldin á vegum undirbúningshóps um frumkvöðlamenntun í Framhaldsskólanum í Austur-Skaftafellssýslu.

Námskeið í 5 ryþma dansi verður haldinn helgina 11.-13. apríl, í Borgarleikhúsinu. Dansinn, sem upphaflega var þróaður af Gabrielle Roth, er leið til aukins frelsis fyrir líkama og sál. Kennari á námskeiðinu er Alain Allard frá Bretlandi, kennari á sviði hreyfingar, sviðslistamaður og með UKCP réttindi í sálfræðimeðferð. Miðvikudaginn 9. apríl kennir Alain Allard einnig opinn tíma í Danshöllinni, Drafnarfelli 2, kl. 17.30-20. Skipuleggjandi námskeiðsins er Sigurborg Kr. Hannesdóttir og veitir hún nánari upplýsingar á skrh@islandia.is. Einnig má fá upplýsingar um dansinn á heimasíðum www.ravenrecroding.com og www.5rhythmsuk.com.

Umsóknarfrestur um skólavist við Háskólann í Reykjavík. Fyrri umsóknarfrestur um nám við Háskólann í Reykjavík veturinn 2003-2004 er til 15. apríl. Svarað er innan þriggja vikna. Síðari umsóknarfresturinn er 5. júní. Skólinn býður uppá fasta viðtalstíma fyrir einstaklinga sem vilja fá námsráðgjöf eða kynningu á skólanum alla miðvikudaga kl. 10-11.30 og föstudaga kl. 13-14.30 fram til 5. júní. Til viðtals eru námsráðgjafar skólans auk kennara og nemenda úr hverri deild. Einnig er hægt að hringja á skrifstofu skólans og panta viðtal hjá námsráðgjafa.