23. febrúar 2004 | Fasteignablað | 197 orð | 2 myndir

Úr húsasafni Þjóðminjasafns

Teigarhorn við Berufjörð

[ Smellið til að sjá stærri mynd ]
Mörg af timburhúsunum í húsasafni Þjóðminjasafnsins tengjast íslenskri verslunarsögu á einn eða annan hátt. Gamla íbúðarhúsið á Teigarhorni var byggt fyrir Weywadt-kaupmannsfjölskylduna á árunum 1880-82.
Mörg af timburhúsunum í húsasafni Þjóðminjasafnsins tengjast íslenskri verslunarsögu á einn eða annan hátt. Gamla íbúðarhúsið á Teigarhorni var byggt fyrir Weywadt-kaupmannsfjölskylduna á árunum 1880-82. Húsið er undir dönskum áhrifum og voru útveggir og þak upphaflega pappaklædd, sem var mjög fátítt hér á landi á þessum tíma.

Steinhlaðinn kjallari er undir húsinu og portbyggð hæð ofan á jarðhæð, en geymsluloft í risi. Grunnflötur hússins er um 65 fermetrar að stærð.

Niels Peter Emil Weywadt (1814-1883) var forstöðumaður Ørum & Wulff´s verslunarinnar við Djúpavog. Hann átti fjölda barna og næstelst þeirra var Nicoline (1848-1921) sem lærði myndasmíði í Kaupmannahöfn fyrst kvenna á Íslandi. Hún kynnti sér jafnframt steinafræði, en á Teigarhorni er fjöldi sérstakra geislasteina.

Nicoline stýrði búi að föður sínum látnum og reisti við húsið ljósmyndaskúr, þar sem hún starfaði að iðn sinni. Hún var einn snjallasti ljósmyndari landsins, og er plötusafn hennar og ýmis áhöld til ljósmyndunar varðveitt í Þjóðminjasafninu. Hjá Nicoline lærði ljósmyndun frænka hennar Hansína Regína Björnsdóttir (1884-1973).

Búið var í húsinu til 1988, og árið 1992 var það tekið í vörslu Þjóðminjasafns Íslands. Unnið var að viðamiklum viðgerðum skömmu síðar, en framkvæmdir hafa legið niðri um skeið. Stefnt er að því að endurreisa ljósmyndaskúrinn.

http://www.thjodminjasafn.is/

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.