Halldór Blöndal
Halldór Blöndal
HALLDÓR Blöndal, forseti Alþingis, opnar nýja sýningu í Jónshúsi við Öster Voldgade 12 í Kaupmannahöfn í dag. Frá árinu 1972 hefur verið uppi sýning í húsinu til minningar um ævi og störf Jóns Sigurðssonar og var sú sýning endurgerð árið 1993.
HALLDÓR Blöndal, forseti Alþingis, opnar nýja sýningu í Jónshúsi við Öster Voldgade 12 í Kaupmannahöfn í dag.

Frá árinu 1972 hefur verið uppi sýning í húsinu til minningar um ævi og störf Jóns Sigurðssonar og var sú sýning endurgerð árið 1993. Alþingi ákvað í tilefni af aldarafmæli heimastjórnar og þingræðis á Íslandi að endurbæta sýninguna í Jónshúsi. Aukið verður við umfjöllun um sjálfstæðisbaráttuna að Jóni Sigurðssyni gengnum og stærstu áfangana sem síðar unnust; heimastjórn árið 1904, fullveldi 1918 og loks lýðveldi árið 1944. Einnig verður sett upp sýning um Ingibjörgu Einarsdóttur konu Jóns og þátt hennar í heimilishaldinu og verður hún í því herbergi sem kallað hefur verið eldhús Ingibjargar. Þar hefur vinnuherbergi fræðimanns verið undanfarin ár, en flyst nú á 2. hæð í húsinu. Munir úr Safni Jóns Sigurðssonar sem Þjóðminjasafn Íslands varðveitir, verða hafðir til sýningar í Jónshúsi.

Guðjón Friðriksson sagnfræðingur semur nýja sýningartexta og Björn G. Björnsson hannar útlit sýningarinnar. Jafnframt verður húsnæðið allt málað og lagfært á ýmsan hátt, bókasafn og önnur starfsemi flutt og löguð að breyttum kröfum.

Hús Jóns Sigurðssonar við Öster Voldgade 12, Austurvegg, er í eigu Alþingis en Carl E. Sæmundsen gaf Alþingi húsið árið 1967 til minningar um Jón Sigurðsson sem bjó þar ásamt Ingibjörgu Einarsdóttur konu sinni frá 1852 þar til þau létust í desember 1879.

Jón Sigurðsson var fremsti leiðtogi Íslendinga í sjálfstæðisbaráttu þjóðarinnar á 19. öld og í Jónshúsi var miðstöð þeirrar baráttu. Þau hjón héldu uppi mikilli risnu á heimili sínu og var það jafnan opið gestum og gangandi. Einu sinni í viku var opið hús og þá söfnuðust Íslendingar í Kaupmannahöfn saman í stofum Jóns og Ingibjargar og nutu gestrisni húsráðenda, segir í fréttatilkynningu frá skrifstofu Alþingis.

Sýningin verður opnuð kl. 15 í dag.