Bjarni Karlsson
Bjarni Karlsson
SÉRA Bjarni Karlsson, sóknarprestur í Laugarneskirkju, gerði samkynhneigð að umræðuefni í predikun sinni í messu á sunnudag og sagðist ekki skilja hvers vegna andstaðan við réttindabaráttu samkynhneigðra væri hvað sterkust í nafni kristinnar trúar.
SÉRA Bjarni Karlsson, sóknarprestur í Laugarneskirkju, gerði samkynhneigð að umræðuefni í predikun sinni í messu á sunnudag og sagðist ekki skilja hvers vegna andstaðan við réttindabaráttu samkynhneigðra væri hvað sterkust í nafni kristinnar trúar. Sagðist hann vonast til að þjóðin og leiðtogar kirkjunnar í landinu mættu skjótt finna farsælar lausnir í þessum efnum því sú tregða sem enn ríkti ylli skelfilegum þjáningum.

Sr. Bjarni vitnaði í fjallræðu Jesú Krists sem sagði: "Dæmið ekki, og þér munuð eigi dæmdir verða. Sakfellið eigi, og þér munuð eigi sakfelldir verða." Sagði hann að í þessu ljósi fyndist honum það skrýtið og óskiljanlegt að mjög margt gott fólk, sem opinberlega kallaði sig kristið, væri alveg sannfært um að samkynhneigðu fólki væri ekki treystandi í þjóðfélaginu.

"Ég skil ekki af hverju andstaðan við réttindabaráttu samkynhneigðra er hvað sterkust í nafni kristinnar trúar. Mér finnst það í sannleika sagt óskiljanlegt. Ítrekað hef ég rætt við góðar og grandvarar manneskjur, fólk sem aldrei myndi vilja vinna nokkurri manneskju ógagn, og ver jafnvel stórum hluta frítíma síns í kærleiks- og líknarþjónustu úti í bæ, en þegar talið berst að réttindum samkynhneigðra þá myrkvast svipur þess og yfir varir sem venjulega blessa allt og alla, velta orð sem virka meiðandi og dæmandi á mig," sagði sr. Bjarni.

Sagði hann að margir yrðu pirraðir, reiðir og smeykir um hitt og þetta í þessari umræðu. "Það eru staðreyndir sem ekki verður á móti mælt að samkynhneigt fólk er á engan hátt öðruvísi en annað fólk að því frátöldu að það hneigist til að elska sama kyn. Þau langar til að eiga ævifélaga af sama kyni. Samkynhneigðir eru ekki síðri uppaldendur en gagnkynhneigðir, nema síður sé, og börn þeirra eru ekki líklegri en börn annarra til að verða sjálf samkynhneigð, ef einhver skyldi nú óttast það."

Jesú bannar fólki að dæma líf annarra

Sr. Bjarni sagði ástæðu þess að hjónabönd væru almennt af hinu góða að með stofnun þess lýsti fólk yfir þeirri hugsjón að lifa saman í trúnaði, ást og virðingu og axla ábyrgð á eigin lífi. Hann spurði hvað væri svo hræðilegt við að tvær konur eða tveir karlmenn tækju þetta skref, og hver leyfði fólki að velta þeim tilfinningum yfir á ókunnugt fólk, sem væri bara að reyna að lifa sínu lífi. "Það getur ekki verið úr Biblíunni, það getur ekki verið frá Jesú Kristi sú hugmynd, að banna fólki að lýsa yfir gagnkvæmum trúnaði, ást og virðingu og axla opinbera ábyrgð á heimili sínu. Ég hafna því," sagði hann og benti á að Jesú bannaði fólki að dæma um líf annarra.

Í Guðspjöllunum fjórum sé ekki að finna eina frásögn þar sem Jesús skammar einhvern fyrir siðferði hans eða efast um ábyrgð fólks á eigin lífi. "Einu mennirnir sem hann ávítaði voru þeir sem töldu sjálfa sig réttláta en fyrirlitu aðra. Það er þess vegna sem mér finnst svo nöturlegt þegar fólk tortryggir samkynhneigða í nafni trúarinnar. Vil ég loks láta í ljós þá bæn að þjóðin og leiðtogar kirkjunnar í landinu megi skjótt finna farsælar lausnir í þessum efnum. Því sú tregða sem enn ríkir veldur skelfilegum þjáningum," sagði sr. Bjarni.