Bale sem Batman, séð með augum aðdáanda.
Bale sem Batman, séð með augum aðdáanda.
TÖKUR á næstu mynd um Leðublökumanninn, Upphaf leðublökumannins ( Batman Begins ), eru hafnar hérlendis. Tökustaðurinn er hjá Freysnesi við Svínafellsjökul, Öræfasveit.
TÖKUR á næstu mynd um Leðublökumanninn, Upphaf leðublökumannins (Batman Begins), eru hafnar hérlendis. Tökustaðurinn er hjá Freysnesi við Svínafellsjökul, Öræfasveit.

Fréttir þessa efnis er hægt að nálgast í gegnum umfangsmikinn vefmiðill sem snýst um myndasögur, www.comicbookresources.com. Sá miðil vísar á minni miðil, www.superherohype.com þar sem einhver dularfullur Vignir segir frá. Hann staðfestir að aðalleikararnir, Christian Bale og Liam Neeson séu komnir á staðinn ásamt leikstjóranum, Christopher Nolan, og tökur muni standa yfir í eina eða tvær vikur. Hundrað manns frá Warner-fyrirtækinu eru á staðnum ásamt starfsfólki frá Saga Film og eru þetta um 150 til 200 manns í allt. Einnig kemur fram að íslenskir starfsmenn séu bundnir ströngum þagnareiði. Vignir þessi hefur verið að skjóta fleiri fréttum á téða síðu. Á www.superherohype.com er einnig ótrúlegt fréttaskot sem leiðir lesendur á heimasíðu íslenska alpaklúbbsins! Á www.isalp.is er hægt að sjá myndir (dagsettar 8. febrúar og 27. febrúar) af Susan Whitaker (aðstoðarstjórnanda leikmyndar), Quentin Davies (leikmunaverði) og fleirum að klöngrast í Skaftafelli og í Kvískerjum.

Fréttaritarar Morgunblaðsins, bæði í Öræfasveit og á Hornafirði, hafa orðið varir við mannaferðir er tengjast klárlega tökum á erlendu stórmyndinni en geta ekki tjáð sig neitt frekar um málið að svo stöddu. Þá segir írska afþreyingarsíðan www.showbizireland.com frá því að sjálfur Edge, gítarleikari U2, muni fara með hlutverk í myndinni. Ekki er gefið upp hvaða hlutverk það verður. Þess má geta að U2 átti aðallagið í þriðju myndinni um Leðurblökumanninn, Leðurblökumaðurinn að eilífu ('95). The Edge mun jafnframt semja tónlist við teiknimyndaröð um Leðurblökumanninn sem frumsýnd verður í haust. Frumsýning á Upphafinu... er hins vegar áætluð sumarið 2005.

Upphaf leðurblökumannsins er fimmta myndin um þessa ofurhetju en áður hafa þeir Michael Keaton, Val Kilmer og George Clooney farið með hlutverkið. Eins og nafnið gefur til kynna er sagt frá því hvernig hinn ungi Bruce Wayne varð að Leðurblökumanninum, eftir að hafa horft upp á morð foreldra sinna. Aðrir sem koma við sögu í myndinni, utan þeir sem taldir hafa verið upp, eru Michael Caine, Morgan Freeman, Liam Neeson, Ken Watanabe, Katie Holmes og Cillian Murphy.

arnart@mbl.is