Birgir D. Sveinsson
Birgir D. Sveinsson
Birgir D. Sveinsson er fæddur 5. apríl 1939 í Neskaupstað. Hann lauk kennaraprófi árið 1960. Var kennari 1960-1977 við Varmárskóla. Yfirkennari 1977-1983 við Varmárskóla. Skólastjóri Varmárskóla1983-2000. Eiginkona Birgis er Jórunn H. Árnadóttir. Börn þeirra eru Sveinn Þ. Birgisson, tónlistarkennari og trompetleikari, Arna Björk Birgisdóttir fædd 22.06. 1961, dáin 12.03. 1964, Arna Björk Birgisdóttir, myndlistarmaður og kennaranemi við LHÍ, og Harpa Birgisdóttir uppeldisfræðingur.
Birgir D. Sveinsson er fæddur 5. apríl 1939 í Neskaupstað. Hann lauk kennaraprófi árið 1960.

Var kennari 1960-1977 við Varmárskóla. Yfirkennari 1977-1983 við Varmárskóla. Skólastjóri Varmárskóla1983-2000. Eiginkona Birgis er Jórunn H. Árnadóttir. Börn þeirra eru Sveinn Þ. Birgisson, tónlistarkennari og trompetleikari, Arna Björk Birgisdóttir fædd 22.06. 1961, dáin 12.03. 1964, Arna Björk Birgisdóttir, myndlistarmaður og kennaranemi við LHÍ, og Harpa Birgisdóttir uppeldisfræðingur.

Skólahljómsveit Mosfellsbæjar heldur um þessar mundir upp á fjörutíu ára afmæli sitt með tilheyrandi tónleikum og uppákomum. Morgunblaðið ræddi af því tilefni við Birgi D. Sveinsson, sem stofnaði hljómsveitina með öðrum á sínum tíma, stofnaði einnig Tónlistarskóla Mosfellsbæjar og hefur lifað tímana tvenna í bæjarfélaginu, því þar voru íbúar aðeins 600 talsins þegar hann flutti þangað, en nærri 6.000 í dag. Eðli málsins samkvæmt ber Birgir hitann og þungann af hátíðarhöldum í tilefni afmælisins, enda hefur hann verið innsti koppur í búri bæjarfélagsins í tónlistarmálum síðustu áratugi.

-Segðu okkur fyrst eitthvað um hljómsveitina, t.d. tilurð þess að hún var stofnuð o.þ.h....

"Þegar ég kom í sveitina 1963 var ekki mikið tónlistarlíf hér og fyrsta þáttaka mín á því sviði var með organistanum Hjalta Þórðarsyni á Æsustöðum. Haustið 1963 fæddist sú hugmynd að efna til tónlistarkennslu í barnaskólanum.

Í fyrstu voru eingöngu drengir valdir til að leika á blásturshljóðfærin en gítarkennari fenginn fyrir stúlkurnar.

Á næstu tveimur árum þróaðist þetta starf í að stofnaður var tónlistarskóli í Mosfellssveit. Í dag starfar hljómsveitin í nánum tengslum við báða grunnskóla bæjarins."

-Hvert er hlutverk skólahljómsveitar af þessu tagi?

"Tónlist og tónlistarnám getur haft margvíslegt hlutverk við að búa börn undir lífið. Allt verklegt nám þroskar börnin ekki síður en bóklegt nám. En Skólahljómsveitin þjónar einnig í raun hlutverki bæjarhljómsveitar. Hún heldur fjölda tónleika á hverju ári og svo fer hún í ferðalög til útlanda."

-Það hljóta margir að hafa spilað með sveitinni á fjörutíu árum, hefurðu tölu yfir það?

"Á þeim 40 árum sem liðin eru hefur mikill fjöldi barna og unglinga tekið þátt í starfi hljómsveitarinnar. Um 130 börn og unglingar eru félagar í hljómsveitinni í dag og er þeim skipt

í þrjá hópa eftir aldri og getu."

-Hafa einhverjir þjóðþekktir menn komið þar við sögu?

"Fjölmargir þekktir tónlistarmenn hafa komið úr smiðju hljómsveitarinnar, þar má nefna: Þorkel Jóelsson hornleikara, Svein Birgisson trompetleikara, Kristjönu Helgadóttur flautuleikara, Jón Halldór Finnsson básúnuleikara, Ólaf Hólm slagverksleikara, Daða Einarsson básúnuleikara og Hjörleif Jónsson slagverksleikara svo nokkrir séu nefndir. Af þjóðþekktum mönnum má nefna Karl Ágúst Úlfsson leikara, Hafþór Hafsteinsson, forstjóra Atlanta, Róbert Wessmann, forstjóra Pharmaco, o.fl."

-Hvað á svo að gera á þessum miklu tímamótum hljómsveitarinnar?

"Í tilefni 40 ára afmælis hefur hljómsveitin efnt til tónleika á starfsárinu s.s. í nóvember sl. með öllum kórum bæjarins, alls um 300 söngvarar. Í febrúar voru sameiginlegir tónleikar með "Stórsveit tónlistarskóla FIH".

Laugardaginn 20. mars kl. 15.00 verða afmælistónleikar hljómsveitarinnar í Íþróttamiðstöðinni á Varmá. Þar mun hljómsveitin frumflytja nýtt tónverk eftir Trevor Ford sem hann hefur samið og tileinkað hljómsveitinni á þessum tímamótum. Verkið byggir hann á íslenska þjóðlaginu "Sofðu unga ástin mín". Einnig má geta þess að Sigrún Hjálmtýsdóttir mun syngja á tónleikunum. Við gerum ráð fyrir að eldri félagar rifji upp kunnáttu sína og taki þátt í tónleikunum og eru þeir hvattir til að koma á æfingu nk. sunnudag kl. 19.00. Föstudaginn 19. mars ætla eldri félagar að hittast í Hlégarði og gera sér glaðan dag með æskufélögum. Á þessum tímamótum hefur hljómsveitin látið gera heimildarmynd um starf Skólahljómsveitar Mosfellsbæjar í 40 ár."

-Er alltaf næg aðsókn í tónlistarnámið og hljómsveit af þessu tagi?

"Mikil áhugi er fyrir starfi hljómsveitarinnar og hefur alltaf verið. Komast því miður færri að en vilja og er þetta þó stór hljómsveit og fjölmenn. Alls eru um 130 nemendur í hljómsveitinni hverju sinni, eins og ég gat um áðan, og er þeim skipt í þrjá hópa sem raðast í eftir aldri nemenda og getu þeirra hópa."

-Eru gróskumiklir tímar framundan á þessum tímamótum?

"Já, það eru gróskutímar framundan. Sem dæmi um það fer fer eldri deildin í tónleika- og skemmtiferð til Lignanó á Ítalíu í júní, en þetta verður tólfta utanlandsferð hljómsveitarinnar. Sjálfur þekki ég vel til á Lignano, en þar starfaði ég lengi sem leiðsögumaður og þangað er alltaf gott að koma."