Heimir Sindrason
Heimir Sindrason
Heimir Sindrason er fæddur í Reykjavík á aðfangadag jóla 1944. Tannlæknir frá tannlæknadeild HÍ árið 1973. Heimir hefur rekið eigin tannlæknastofu frá árinu 1973. Hann var kosinn formaður Tannlæknafélags Íslands í nóvember árið 2003. Maki Heimis er Anna L. Tryggvadóttir meinatæknir og börn þeirra eru Kristín tannlæknir, Sigríður iðnhönnuður, Frosti nemi og Guðrún, viðskiptafræðingur og blaðamaður.
Heimir Sindrason er fæddur í Reykjavík á aðfangadag jóla 1944. Tannlæknir frá tannlæknadeild HÍ árið 1973. Heimir hefur rekið eigin tannlæknastofu frá árinu 1973. Hann var kosinn formaður Tannlæknafélags Íslands í nóvember árið 2003. Maki Heimis er Anna L. Tryggvadóttir meinatæknir og börn þeirra eru Kristín tannlæknir, Sigríður iðnhönnuður, Frosti nemi og Guðrún, viðskiptafræðingur og blaðamaður.

Tannlæknafélag Íslands stendur fyrir málþingi á Grand hóteli Reykjavík á morgun, laugardag. Þingið stendur frá kl. 9.30 til 12.30. Morgunblaðið ræddi við Heimi Sindrason, tannlækni og formann Tannlæknafélags Íslands, um málþingið, yfirskrift þess, tilgang og áherslur.

Hver er yfirskrift málþingsins og hvað felst í henni?

"Yfirskriftin er "Er tannheilsa íslenskra barna í hættu?", en hún endurspeglar áhyggjur tannlækna af framtíðinni í ljósi reynslunnar."

Er tannheilsa íslenskra barna í raunverulegri hættu?

"Já, við teljum að svo sé."

Hvert er tilefni málþingsins og hver verða helstu áhersluatriði þess?

"Tilefni málþingsins eru auknar tannskemmdir sem tannlæknar eru farnir að sjá hjá skólabörnum og ungmennum. Gífurleg gosdrykkjaneysla er farin að valda ótrúlega miklu sliti á tönnum, sliti sem var nánast óþekkt fyrir nokkrum árum. Á sama tíma staðfesta opinberar tölur að heimsóknum barna og unglinga til tannlæknis hefur fækkað ískyggilega á síðustu árum. Heimturnar hafa fallið úr 90 í 70%. Með samstilltu átaki á síðasta aldarfjórðungi tókst íslenskum tannlæknum og heilbrigðisyfirvöldum að snúa skelfilegri tannheilsu Íslendinga til eins þess besta sem gerist í heiminum. En fyrir nokkrum árum fóru stjórnvöld að draga verulega úr framlagi til tannheilsugæslu. Og margt bendir til þess að sú aðgerð, sem hefur mjög íþyngjandi áhrif, sé farin að valda viðsnúningi í tannheilsu barna og unglinga. Við hljótum að spyrja hverju það sætir að gert er svo upp á milli líkamshlutanna. Á sama tíma og dregið hefur verið úr framlagi til tannheilsugæslu um 30% hefur framlag til flestrar annarrar heilsugæslu verið aukið um sömu prósentutölu. Ég fæ 60% samdrátt út úr þessu dæmi en ég var að vísu í máladeild MR. Eitt er þó óumdeilanlegt: Það hallar orðið óeðlilega á börn og unglinga í tannheilbrigðismálum."

Hverjir eru framsögumenn og um hvað munu þeir tala?

"Heilbrigðisráðherra mun gera okkur þann heiður að setja þingið. Síðan mun Reynir Jónsson, yfirtryggingatannlæknir TR, halda tölu þar sem hann svarar spurningunni í yfirskrift málþingsins játandi. Sigurður Rúnar Sæmundsson, sérfræðingur í samfélagstannlækningum, veltir síðan upp spurningum um hlutverk TR í tannheilsugæslu.

Dr. Helga Ágústsdóttir, yfirtannlæknir heilbrigðis- og tryggingaráðuneytisins, fer yfir heimtur barna og fyrirhugaða rannsókn á munnheilsu á Íslandi. Sigurður Örn Eiríksson, tannlæknir og lektor við HÍ, mun svo tala um það sem ég gat um hér að framan, þ.e. tannskemmdir og glerungseyðingu. Inga B. Árnadóttir, dósent við HÍ, flytur erindi sem hún kallar

Tannheilsa unglinga - lífsstíll - áhætta - stuðningur. Síðast en ekki síst ætlar Bergþóra Valsdóttir, framkvæmdastjóri SAMFOKs, að leggja þessu máli lið en hún spyr spurningarinnar sem allir tannlæknar hafa spurt lengi; Er tannheilsa ómerkilegri en önnur heilsa? Okkur þykir mikill fengur að fá til liðs við okkur fulltrúa þess hóps sem við erum að reyna að ná til, foreldra. Sigmundur Ernir Rúnarsson mun svo stjórna málþinginu af sinni alkunnu röggsemi."

Er þetta opið málþing eða er það fyrir einhvern lokaðan hóp?

"Þetta er galopið málþing og við vonum að sem flestir foreldrar vilji koma. Sætafjöldi er hins vegar takmarkaður og áhugasamir því beðnir að tilkynna þátttöku með því að senda póst á netfangið tannsi@tannsi.is."

Er meiningin að taka einhverjar niðurstöður með sér í frekari vinnslu, t.d. gagnvart ráðamönnum?

"Við sendum boðskort til alþingismanna, heilbrigðisnefnda stjórnmálaflokkanna, skólanefndamanna, foreldrafélaga grunnskóla, forsvarsmanna foreldrasamtaka og hagsmunaaðila barna. Skilaboðin eru mjög skýr. Hættan er aðsteðjandi og við ætlum að leggja fram gögn sem sýna að svo sé. Vonandi verður þetta málþing upphafið að því að menn snúa vörn í sókn. Það verður stuðst við tölur sem þegar eru skjalfestar svo og rannsóknir sem hafa verið gerðar og greint frá rannsóknum sem eru í uppsiglingu.

Auðvitað ætlum við að koma skilaboðunum til ráðamanna en hins vegar eru tannlæknar vonlaus þrýstihópur. Þrýstingurinn verður að koma frá þolendum þessarar öfugþróunar, foreldrum barnanna. Þeir verða fyrir barðinu á minnkandi framlagi hins opinbera til tannheilsugæslu og það eru þeir sem þurfa að ítreka spurninguna "Er tannheilsa ómerkilegri en önnur heilsa?"."