Marta G. Halldórsdóttir og Örn Magnússon fluttu lög eftir Mozart, Haydn, Mendelssohn, Gunnar Reyni Sveinsson og Gunnstein Ólafsson. Sunnudagur 10. október.

Þykki horinn græni og hræðilegur óvættur var meðal þess sem Marta G. Halldórsdóttir söng um á tónleikum í Listasafni Sigurjóns á sunnudaginn var. Það var svo sannarlega ólystugt, en engu að síður sjarmerandi, því tónlistin var ljóðræn og á köflum fyndin; hefði jafnvel sómt sér ágætlega í Disneymynd. Lögin voru úr lagaflokknum Búðin hans Mústafa (texti úr samnefndri bók eftir Jakob Martin Strid) og voru eftir Gunnstein Ólafsson; sérlega líflegar tónsmíðar; tilgerðarlausar og grípandi, án þess að vera ódýrar. Tónmálið var hefðbundið - en hver segir að nútímatónlist þurfi alltaf að vera torskilin? Örn Magnússon píanóleikari spilaði með Mörtu og gerði það ákaflega vel; áslátturinn var hlýlegur og mjúkur og hann fylgdi söngkonunni fullkomlega. Voru tónleikarnir á vegum Tónskóla Sigursveins í tilefni 40 ára afmælis skólans fyrr á árinu.

Á efnisskránni var bæði íslensk og erlend tónlist; þar á meðal lög eftir Gunnar Reyni Sveinsson sem nefnast Fimm númer á íslenskum þjóðbúningi. Þau voru fremur ofhlaðin; vissulega byggð á ágætum hugmyndum, en úrvinnslan var of tilgerðarleg, eins og tónskáldið hefði ekkert að segja - en vildi samt segja eitthvað djúpviturt og merkilegt. Hugsanlega hefðu bæði söngkonan og píanóleikarinn átt að draga aðeins úr belgingnum í tónlistinni.

Annað á efnisskránni var yfirleitt prýðilegt, en það voru lög eftir Mozart, Haydn og Mendelssohn. Reyndar hentar skær, jafnvel hvöss rödd Mörtu best endurreisnar- og barokktónlist, auk þess sem hún þarf meiri endurómun til að njóta sín, en mögnuð túlkunin bætti upp fyrir tæknilega annmarka. Neue Liebe eftir Mendelssohn, sem fjallar um hrollvekjandi álfareið í tunglskininu í skóginum, var t.d. einstaklega áhrifamikið, ekki síst fyrir tilstilli Arnar; maður gat bókstaflega heyrt hófadyninn í glæsilegum píanóleiknum.

Þetta voru skemmtilegir tónleikar með innblásnu listafólki og hafi ég ekki gert það þá óska ég Tónskóla Sigursveins til hamingju með afmælið.

Jónas Sen