12. nóvember 2004 | Tónlist | 886 orð | 1 mynd

Tónlist | Poppaða rappsveitin Igore sendir frá sér plötuna Níu líf

Ekki bara sumar og kókómalt

Igore - "ekki beint þessi týpíska rapphljómsveit": Daníel Örn "skratsari", Friðrik Fannar rappari og forritari, Rakel rappari og Kristín Ýr söngkona og höfundur flestra texta.
Igore - "ekki beint þessi týpíska rapphljómsveit": Daníel Örn "skratsari", Friðrik Fannar rappari og forritari, Rakel rappari og Kristín Ýr söngkona og höfundur flestra texta.
Þau eru ung, fersk og skemmtileg og í uppáhaldi hjá FM957. Inga Rún Sigurðardóttir ræddi við hljómsveitina Igore um nýju plötuna.
Hljómsveitin Igore var að senda frá sér plötuna Níu líf en hún vakti mikla athygli í sumar fyrir lagið "Sumarsykur". Igore skipa fjögur ungmenni úr Breiðholti og Grafarvogi á aldrinum 17-20 ára og ævintýrið byrjaði í Miðbergi. Friðrik Fannar Thorlacius, sem sér um rapp og forritun, og Kristín Ýr Bjarnadóttir, rappari og fótboltastjarna, verða fyrir svörum en til viðbótar skipa sveitina Rakel Magnúsdóttir söngkona og Daníel Örn Jóhannesson "skratsari".

"Ég og Frikki tókum þátt í undankeppni fyrir Samfés í Miðbergi. Þegar við vorum að æfa fyrir úrslitakeppnina þá kom strákur sem heitir Pétur [Örn Gunnarsson] inn í þetta," segir Kristín en þau lentu í þriðja sæti í Söngvakeppni Samfés árið 1999 en þess má geta að Pétur vann sömu keppni árið eftir.

Fyrir Samféskeppnina höfðu þau ákveðið að stofna hljómsveit ef þeim gengi vel. Þegar þriðja sætið var í höfn varð til hljómsveitin Sapiantorres, sem þýðir hin hyggnu á latínu. Sú sveit lifði ekki lengi, Kristín hætti að rappa og ákvað að einbeita sér að fótboltanum. Hún hefur æft síðan hún var fimm ára og spilar í meistaraflokki með Val og er Íslandsmeistari.

"Frikki hélt áfram að semja takta og samdi "Hverju hef ég að tapa?" Þá komu Rakel og Pétur inn í það og Igore varð til," segir Kristín en þetta er árið 2000. "Við unnum árið 2000 Rímnaflæði á Ingólfstorgi. Þá var Kristín ekki komin inn heldur var að horfa á," segir Friðrik. "Árið 2001 spyr Frikki hvort ég vilji gera lag með honum. Ég heyri takt sem mér leist vel á og það varð lagið "Kókómalt"," segir Kristín en myndband við lagið hlaut nokkra spilun. Daníel kemur inn í hljómsveitina á svipuðum tíma en Pétur flutti út til London með fjölskyldunni.

Plötusamningur í höfn

Igore skrifaði í maí á þessu ári undir plötusamning við Skífuna. "Við erum búin að taka meira en helminginn af þessari plötu þrisvar sinnum upp," segir Friðrik en þau höfðu m.a. tekið upp í Stúdíói Geimsteini og Thule áður en Skífan kom til sögunnar.

Þau leituðu fyrst til Skífunnar í fyrra en fengu þau svör að þau væru of sein fyrir og ættu að koma á næsta ári. "Núna komum við með hálfkláraða plötu og búin að gera myndbönd sem höfðu fengið spilun," segir Friðrik en hljómsveitin var farin að vekja meiri athygli, m.a. þegar hún spilaði á síðustu Hlustendaverðlaunum FM957 í febrúar en útvarpsstöðin hefur hampað sveitinni.

Flest lögin eru á íslensku en einhver á ensku. "Ég hef samið á ensku og íslensku. Ég er betri í að semja texta á íslensku því þá veit ég meira um hvað ég er að tala. Á ensku syng ég eitthvað sem rímar og úr því verða meiri stuðlög," segir Kristín og þau eru sammála um að þeim þykji jafngott og jafneðlilegt að syngja á ensku og íslensku.

Kristín semur flesta textana: "Ég reyni að setja mig í karakter í laginu og lifa mig inn í persónuna. Einhverjir textar eru af eigin reynslu en þetta hefur ekki allt komið fyrir mig."

Kjósa lifandi tónlist

Hvernig hljómsveit er Igore? "Við erum ekki beint þessi týpíska rapphljómsveit og ekki beint popphljómsveit heldur erum einhvers staðar þarna á milli," segir Kristín.

Friðrik semur alla tónlistina en ber taktana undir hina meðlimina og prófar þá á þeim "Og á plötunni eru "live" útgáfur af þessu," segir hann. "Á tónleikum kjósum við frekar að hafa "live" hljómsveit með okkur en það er ekki alltaf boðið upp á það," segir Kristín en stefnt er á að halda útgáfutónleika í tilefni plötunnar í lok nóvember.

"Ef ég kemst með hendurnar í einhver hljóðfæri þá spila ég á þau. Ég kann ekkert í tónfræði, ég kann nótur en hef ekkert lært en er fljótur að pikka ýmislegt upp," segir Friðrik. "Tónlistin byggist líka upp á sömplum. Í laginu "Hverju höfum við að tapa?" fáum við að nota sampl úr laginu "Myndum" með Vilhjálmi Vilhjálmssyni," segir hann. "Annars er Muse númer eitt," segir Friðrik aðspurður um hljómsveitir sem hann fái innblástur frá. "Tónlistin þeirra er svo melódísk og gefur svo miklar hugmyndir um hvað er hægt að gera."

Góðir gestir á plötunni

Igore var í einu lagi á plötunni Tengslum með Í svörtum fötum. Kristín gerði textann við lagið "Langar til að lifa" með Jóni Jósepi Snæbjörnssyni. "Við vorum á útgáfutónleikunum þeirra sem var stórt fyrir okkur og núna er Jónsi í einu lagi á plötunni okkar," segir Kristín en hann syngur í laginu "Franskur dúett" ásamt tveimur óperusöngkonum. Fleiri góðir gestir eru á plötunni en Ragnheiður Gröndal syngur bakraddir í "Hverju hef ég að tapa?"

Kristínu tekst ágætlega að tvinna saman fótbolta- og hljómsveitaræfingar. "Þetta fer ágætlega saman. Það er mjög mikið að gera í fótboltanum á sumrin. Ég sagði við krakkana þegar við vorum að byrja að ég tæki fótboltann framyfir. Núna er lán í óláni að ég þurfti að fara í aðgerð á fæti og er ekki búin að spila fótbolta frá 11. september. Ég spilaði bikarúrslitaleikinn en á ekki eftir að spila neitt þar til eftir áramót," segir Kristín sem losnaði við gifsið í vikunni og hefur nógan tíma til að sinna Igore um þessar mundir.

Núna er nýtt lag komið í spilun með Igore sem heitir "Rhythm & Blues". "Það er að brjóta svolítið klakann fyrir okkur og við erum að komast út úr sumarsykurs-kókómaltslögunum," segir Friðrik en lagið hjómar nú í útvarpinu og er spilað á Popp Tíví.

www.igore.tk

ingarun@mbl.is

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.