Glaðlegur og hressandi í viðmóti, ákveðinn og einarður í skoðunum, hreinskilinn og hreinskiptinn, hver sem hlut á að máli. Þannig kom vinur minn, Arnfinnur Arnfinnsson, mér fyrir sjónir við fyrstu kynni og slíkan hefi ég reynt hann til þessa dags.

Hann ber aldurinn ekki með sér. Fæstir myndu renna grun í, að hann væri orðinn sjötugur, þó að sú sé nú raunin á.

Arnfinnur fæddist í Vallarborg á Ísafirði 28. janúar 1923. Foreldrar hans voru Arnfinnur Jónsson frá Gröf í Þorskafirði og Jakobína Jakobsdóttir, fædd Ísfirðingur en ættuð úr Húnaþingi. Hann var yngstur fjögurra albræðra og er hann sá eini þeirra, sem enn er á lífi. Tveir af þremur hálfbræðrum hans eru einnig á lífi. Átján mánaða gamall var Arnfinnur tekinn í fóstur af hjónunum Helga Eiríkssyni og Guðrúnu Ólafsdóttur í Miðdal í Bolungarvík og ólst þar upp sem þeirra eiginn sonur. Hjá þeim dvaldi hann svo til 1948 og vann þar við landbúnaðarstörf eftir að hann hafði lokið skólanámi. Svo var það í maímánuði árið 1948 að hann kvaddi Vestfirðina fyrir fullt og allt og fluttist til Akureyrar. Þar fór hann að starfa hjá Kaupfélagi Eyfirðinga. Á þeim árum tók hann einnig virkan þátt í verkalýðsbaráttunni, og var um skeið ritari og varaformaður Iðju, félags verksmiðjufólks á Akureyri. Hjá KEA starfaði Arnfinnur í 17 ár. Þá gerðist hann starfsmaður Góðtemplarareglunnar á Akureyri og hafði með höndum hótelstjórn á Hótel Varðborg, sem þá var í eigu Reglunnar. Árið 1970 gerðist hann framkvæmdastjóri fyrirtækja Reglunnar á Akureyri og í dag er hann framkvæmdastjóri Borgarbíós þar í bæ.

Hótelinu stjórnaði hann frá 1965 til 1989, en þá seldi Reglan það. Arnfinnur gerðist félagi í stúkunni Ísafold-Fjallkonan nr. 1 árið 1963 og hefir starfað í henni til þessa dags. Hann hefir löngum verið í forystusveit norðlenskra góðtemplara og oft látið mjög til sín taka. Í stúku sinni hefir hann skipað öll æðstu embættin með miklum sóma, og glöggskyggn er hann á hið mikla gildi siðakerfis Reglunnar.

Barnastúkustarfi sinnti Arnfinnur einnig um langt skeið í nágrannabyggðum Akureyrar, bæði á Dalvík og í Hrísey.

Í framkvæmdanefnd Stórstúku Íslands hefur Arnfinnur átt sæti hátt á annan áratug og löngum gegnt þar gjaldkeraembætti. Þar sem annars staðar hefir hann skipað sæti sitt á þann veg að vart verður á betra kosið. Þar hefir glöggskyggni hans og gjörhygli notið sín næsta vel. Og gott hefir verið að hafa hann sér við hlið til halds og trausts í erfiðum málum. Hann er bæði ráðsnjall og ráðhollur og jafnframt því segir hann sína meiningu afdráttar- og umbúðalaust. Slíka menn er gott að hafa hið næsta sér, bæði í vináttu og samstarfi. Arnfinni er margt til lista lagt. Hann er söngmaður góður og hafa kirkjukórar á Akureyri fengið í ríkum mæli að njóta þess. Hann er líka mikill bókamaður, víðlesinn og margfróður, mikill húmoristi, bráðskemmtilegur og mjög vel máli farinn. Hann er nokkuð ör í lund og stundum óþægilega orðhvatur, að því er sumum finnst, en alltaf hreinn og beinn, hugsjónaríkur eldhugi og drengskaparmaður.

Í einkalífi sínu er Arnfinnur mikill gæfumaður. Hann giftist árið 1949 Elínu Sumarliðadóttur frá Bolungarvík, hinni ágætustu konu, sem verið hefir manni sínum traustur lífsförunautur. Þau eiga 5 börn, sem öll eru á lífi. Guðrún og Bryndís búa í Reykjavík, María og Sigurður eiga heima á Akureyri og Arna býr á Blönduósi. Barnabörnin eru 15 talsins og 4 langafabörn hafa litið dagsins ljós. Allt er þetta hið efnilegasta fólk, svo hiklaust má segja, að þau hjónin eigi barnaláni að fagna.

Það var ósk mín og ætlun að sækja Arnfinn heim og gleðjast með honum á þessum heiðursdegi hans. En starfsannir leyfðu mér það ekki.

Því verð ég að láta nægja að dvelja með þér, kæri vinur, í anda og árna þér heilla og blessunar á þessum tímamótum í lífi þínu. Í nafni Stórstúku Íslands þakka ég þér sérstaklega öll þín miklu og margþættu störf í hennar þágu og Góðtemplarareglunnar á Íslandi, bæði í þinni heimabyggð og víðs vegar annars staðar. Þú ert einn þeirra, sem velt hefir björgum á vettvanginum þeim.

Heill og gifta fylgi þér, kæri vinur, bæði í störfum og einkalífi, héðan í frá sem hingað til.

Þess skal að lokum getið, að Arnfinnur og Elín taka á móti gestum í Húsi aldraðra við Lundargötu 7 á Akureyri frá kl. 19 í dag.

Björn Jónsson

stórtemeplar.