Lambafillet er huggulegur matur sem gott er að eiga í fyrsti og hægt er að elda á hinn ýmsa máta. Til dæmis sous-vide eða marinera og steikja á pönnu eins og Helena Gunnar matarbloggari hjá Gottimatinn.is gerir hér.
Lambafillet með stökkri puru
- 1.200 g lambafillet (1 stk. á mann)
- gott sjávarsalt
- nýmalaður pipar
- 2 stk. ferskar timíangreinar (2-3 stk.)
- 1 dl ólífuolía
- 50 g smjör
Aðferð:
- Ef ætlunin er að hafa lambakjöt í kvöldmat er gott að taka það úr ísskápnum að morgni. Snyrta bitana, skera af aukafitu og sinar ef einhverjar eru og skera í fituna tíglamynstur niður að kjötinu. Gætið þess að skera ekki í kjötið sjálft. Kjötið er svo kryddað vel með salti og pipar. Sett í fat og ólífuolíu hellt yfir kjötið og því velt vel upp úr henni. Svo er fatið sett inn í ísskáp, engin filma yfir og fituhliðin látin snúa upp.
- Einni klst. áður en kjötið er eldað er gott að taka það úr ísskápnum og leyfa því að ná stofuhita.
- Hitið ofn í 180°C. Bræðið 50 g af smjöri á pönnu við meðalháan hita, setjið timíangreinarnar í smjörið og leyfið þeim að krauma með. Steikið kjötið svo á fituhliðinni í smjörinu í góðar fjórar mínútur eða þar til puran er gullin og stökk. Snúið þá kjötinu við og stingið inn í ofn í 10-12 mínútur. Þá ætti steikin að vera fallega bleik í miðjunni. Ef þið viljið gegnsteikja kjötið er vissara að hafa það í 15-17 mínútur í ofninum.
- Þegar kjötið er tekið út er smjörinu og fitunni sem er á pönnunni ausið yfir kjötið. Leyfið kjötinu svo að standa í 10 mínútur áður en það er skorið.