Matur | mbl | 5.2.2018 | 17:45 | Uppfært 7.2.2018 12:44

Mjúk súkkulaðikaka með salt-karamellupoppkorni

Að baka súkkulaðitertu yfir vatnsbaði inni í ofni gefur tertunni ákaflega mjúka og ljúffenga áferð. mbl.is/Fredik Ringe

Christopher William Davidsen, einn færustu kokka Noregs, verður gestadómari í keppninni Kokkur ársins 2018 sem fram fer í Hörpu 24. febrúar.

Við á Matarvefnum höfðum þó mestan áhuga á að elda eins og stjörnukokkur og fengum því þessa ljúffengu uppskrift frá Cristopher en hún er úr matreiðslubók hans, Mat hjemmefra, sem kom út árið 2017.

Súkkulaðikaka með saltkaramellu-poppkorni

650 g dökkt súkkulaði
375 g smjör
8 egg
150 g sykur
400 g sykur
2 dl vatn

Karamellupoppkorn

100 g sykur
100 g poppkorn
klípa maldon-salt

Bræðið súkkulaði og smjör saman í skál yfir vatnsbaði.
Þeytið eggin og 150 g af sykri uns létt og ljóst.
Bræðið 400 g af sykri í potti með 2 dl af vatni.
Hrærið bræddu súkkulaði-og smjörblöndunni og sykursírópinu saman í hrærivél.
Hellið blöndunni varlega saman við eggjablönduna og hrærið varlega saman.
Hellið deiginu í álpappírsfóðrað kökumót og bakið í vatnsbaði (vatnið á að ná upp á mitt kökumótið) við 160 gráður í 25 mínútur.

Poppkornið:
Bræðið sykurinn í potti við vægan hita og hellið poppkorninu út í þegar karamellan er farin að myndast og er heit.

Hellið poppkorninu yfir bökunarpappír og stráið salti yfir. Látið kólna.

Skreytið tertuna með poppkorni.

Christopher er upprunalega frá Stavanger en býr og starfar í Þrándheimi. Hann er núna yfirkokkur hjá CAYA og veitingakeðjunni Søstrene Karlsen, en tekur síðan flljótlega við starfi hjá sögufræga Brittania-hótelinu í Þrándheimi sem opnar eftir gagngerar endurbætur 2019. mbl.is/Fredik Ringe