The Travelling spoon er vefsíða sem ferðalangar og matarunnendur verða að þekkja. The Forbes kallar síðuna næstu kynslóð af ferðamennsku og lofar hana í hástert.
Síðan er í raun leitarvél sem flokkar gestgjafa eftir staðsetningu og matarframboði. Gestgjafarnir sérhæfa sig í að taka á móti ferðamönnum og elda fyrir þá. Hægt er að velja um sýnikennslu, markaðsferð eða eingöngu málsverð. Valmöguleikarnir eru töluverðir og getur fólk valið að mæta í hádegisverð eða kvöldverð, fá vínglas með matnum, hvernig mat það vill, jafnvel karaktereinkenni og aldur gestgjafanna.
Því geta ferðalangar til dæmis í Japan eða á Ítalíu bókað sig í kvöldverð hjá heimamönnum og fengið að kynnast landinu, staðarháttum og matarmenningunni beint frá fólkinu sem þekkir hana.
Verðið er mjög misjafnt en hægt er að skoða meðmæli og myndir af húsakynnum gestgjafa og myndir af matnum sem boðið er upp á. Á Íslandi eru þrír gestgjafar skráðir en hægt er að sækja um að verða gestgjafi á síðunni. Þá er sendur sendiherra frá síðunni heim til umsækjenda og tekur sendiherrann út matinn og umhverfið áður en gestgjafar geta opinberlega tekið á móti fólki.
Virkilega sniðug síða sem vert er að skoða og jafnvel bóka sig í kvöldmat næst þegar ferðast er.