Mexíkósk tacobaka sem slær í gegn

Bragðmikil baka sem klárast alltaf í veislum.
Bragðmikil baka sem klárast alltaf í veislum. mbl.is/ljufmeti.com

Þessi tacobaka er æðislega góð og mjög vinsæl í veislum og boðum hjá minni fjölskyldu. Þessi uppskrift er frá Svövu á ljufmeti.com og slær alltaf í gegn!

Botn

  • 4 dl hveiti
  • 2 tsk. lyftiduft
  • 1/2 tsk. salt
  • 50 gr. smjör
  • 1 1/2 dl mjólk

Fylling

  • 500 gr. nautahakk
  • 1 laukur
  • 2 hvítlauksrif
  • 3 msk. tómatpuré
  • 2 msk. chili-sósa
  • 1 msk. sojasósa
  • 2 tsk. chili-pipar (krydd)
  • 2 tsk. cummin
  • 2 tsk. kóriander (krydd)
  • 2 tsk. karrý
  • 1-2 tsk. salt
  • 2 dl vatn

Ofanlag

  • 3 tómatar
  • 2 dl sýrður rjómi
  • 4 msk. majónes
  • 150 gr. rifinn ostur

Hitið ofninn í 200°. Blandið saman hveiti, lyftidufti og salti í skál. Látið smjörið ná stofuhita, skerið það í bita og blandið því við þurrefnin. Bætið mjólkinni saman við og hrærið öllu saman í deig. Þrýstið deiginu í bökuform eða smelluform. Það þarf ekki að forbaka botninn.

Hakkið lauk og steikið ásamt nautahakki og fínt hökkuðum hvítlauk. Steikið þar til nautahakkið er ekki lengur rautt. Bætið tómatpuré, chili-sósu og sojasósu á pönnuna ásamt kryddunum og vatni. Látið sjóða við vægan hita þar til vatnið er næstum horfið, ca. 10-15 mínútur. Smakkið til og kryddið meira ef þarf. Setjið nautahakkið yfir botninn.

Skerið tómatana í bita og dreifið yfir nautahakkið.

Hrærið saman sýrðum rjóma, majónesi og rifnum osti og breiðið yfir tómatana.

Bakið í miðjum ofni í ca. 15 mínútur eða þar til osturinn er bráðinn og hefur fengið fallegan lit.

Berið fram með góðu salati, nachos, sýrðum rjóma, salsa eða guacamole.

Mér finnst gott að setja ferskt kóríander ofan á bökuna …
Mér finnst gott að setja ferskt kóríander ofan á bökuna áður en hún er borin fram. mbl.is/ljufmeti.com
mbl.is