Matur | mbl | 20.3.2018 | 14:02

Bakað fyrir húsmæðraorlof

Ekkert að þessum elskum. mbl.is/Berglind Hreiðarsdóttir

Þegar stefnan er tekin á húsmæðraorlof er nauðsynlegt að undirbúa sig vel. Þá er oftar en ekki tilefni til að baka forláta bollakökur eins og matarbloggarinn Berglind Hreiðarsdóttir á Gotteri.is gerði.

Hún er einmitt á leiðinni í slíkt orlof og segir að það hafi ekkert annað verið í stöðunni en að baka þessar kökur sem tengja hana svo rækilega við áfangastaðinn. Kökurnar heita Neopolitan Cupcakes og eru að sögn Berglindar algjörlega frábærar.

Súkkulaðibollakökur

Uppskriftin gefur um 20-24 bollakökur. Ég notaðist við 1M stút frá Wilton og sprautaði fyrst hvítu smjörkremi á kökuna og því næst bleika jarðarberjasmjörkreminu. Marglitu kökuskrauti er stráð yfir og kirsuber sett á toppinn.

320 gr. hveiti
85 gr. bökunarkakó
2 ½ tsk. lyftiduft
1 ½ tsk. matarsódi
¾ tsk. salt
3 egg
300 ml bolli mjólk
110 ml matarolía
1 msk. vanilludropar
380 gr. sykur
200 ml sjóðandi vatn

Aðferð:

Hitið ofninn 175°C.
Sigtið saman hveiti, kakó, lyftiduft, matarsóda og salt og leggið til hliðar.
Blandið eggjum, mjólk, olíu og vanillu saman í hrærivélinni.
Bætið þá sykrinum og öllum þurrefnunum saman við. Hrærið á lágum hraða til að byrja með en síðan á meðalhraða í um tvær mínútur eða þar til deigið er orðið slétt og fallegt.
Blandið að lokum sjóðandi vatninu varlega saman við deigið með sleif þar til það verður slétt að nýju. Deigið á að vera þunnt.
Leyfið deiginu að hvíla í 15 mínútur og hrærið þá aðeins upp í því að nýju.
Fyllið ¾ hluta af bollakökuformunum með deigi og bakið þar til prjónn kemur út með smá kökumylsnu (ekki blautu deigi) eða í um 20 mínútur.
Kælið bollakökurnar og útbúið kremið á meðan.

Vanillu- og jarðaberja smjörkrem

500 gr. smjör við stofuhita
900 gr. flórsykur (sigtaður)
2 tsk. vanilludropar
¼ tsk. salt
200 gr. fersk maukuð jarðarber (eða jarðarberjasulta)
Marglitt kökuskraut
Niðursoðin kirsuber með stönglum

Aðferð:

Þeytið smjörið þar til létt og ljóst.
Bætið flórsykrinum saman við í litlum skömmtum og blandið á lágum hraða.
Að lokum fara vanilludroparnir og saltið saman við blönduna og kremið þeytt í nokkrar mínútur þar til létt og ljóst og skafið nokkrum sinnum niður á milli.
Takið rúmlega 1/3 af vanillukreminu til hliðar og setjið jarðarberjamaukið saman við tæplega 2/3 af kreminu og blandið vel.
Ég notaði stút 1M frá Wilton og byrjaði á því að sprauta jarðarberjakreminu í rúman hring og síðan vanillukreminu þar ofan á. Þá er kökuskrauti stráð yfir og kirsuber sett á toppinn.