Matur | mbl | 9.4.2018 | 11:00

Bragðmiklir þorskhnakkar eldaðir í einni pönnu

Þessi réttur á eftir að slá í gegn á mörgum heimilum. mbl.is/Linda Ben

Þessi þorskréttur tikkar í öll box. Merkilega einfaldur, hollur og bragðmikill, auk þess sem hann er fljótgerður. Þar fyrir utan veitir okkur útrás fyrir ást okkar á steypujárni sem er alltaf jákvætt.

Það er Linda Ben sem á þessa uppskrift en fyrir þá sem vilja fá ítarlegri útlistun á verkferlinu er hægt að nálgast það hér.

Bragðmiklir þorskhnakkar eldaðir í einni pönnu

700 g þorskhnakkar
salt og pipar
2 msk ólífu olía
2 hvítlauksgeirar
½ tsk þurrkað rautt chilli
½ pakki forsoðnar kartöflur
200 g kirsuberjatómatar
1 dl hvítvín
mosarella kúlur
svartar heilar ólífur
Börkur af 1 sítrónu
Ferskt basil eftir smekk

Aðferð:

Kveikið á ofninum og stillið á 200°C.
Setjið ólífu olíu á pönnu, skerið hvítlaukinn smátt niður og steikið hann á pönnunni með chillíinu.
Setjið kartöflurnar út á pönnuna og steikið létt. Setjið tómatana á pönnuna og steikið. Kryddið þorskhnakkana með salti og pipar, setjið stykkin á pönnuna. Látið fiskinn steikjast í nokkrar mín og snúið honum svo við, gott að hræra í grænmetinu líka. Hellið hvítvíninu á pönnuna, setjið ólífurnar einnig á pönnuna og mosarella kúlurnar. Setjið pönnuna inn í ofn og bakið í 15-20 mín.
Rífið sítrónubörkinn og basil laufin yfir réttinn.