Hrátt útlit þessa fagra eldhúss höfðar eflaust til margra og minnir helst á iðnaðarhúsnæði í New York þar sem svokölluð loft eru vinsæl. Lofthæðin er geggjuð og gluggarnir líka. Reyndar er allt við þetta eldhús frekar geggjað – þó ekki síst hvernig eldhúsið fellur vel að grófri steypunni og virðist smellpassa þar inn.

Eldhúsinnréttingin er frá danska hönnunarfyrirtækinu Reform sem við höfum áður fjallað um. Borðplatan er úr eik og takið eftir hvernig eyjan nýtist einnig sem eldhúsborð ef því er að skipta. Á henni er hvítur marmari sem skapar skemmtilegt mótvægi við grófleika eldhússins. 

Engar kryddplöntur prýða eldhúsið heldur grjótharður eyðimerkurkaktus.