Matur | mbl | 22.4.2018 | 19:37 | Uppfært 21:29

Granóla úr þykjustuþætti Jennifer Garner

Jennifer Garner er hér einstaklega einbeitt á svipinn við að útskýra hvernig hún þjappar granólað almennilega í formið og hversu mikilvæg góð þjöppun er. mbl.is/skjáskot af þykjustu matreiðsluþætti Jennifer Garner.

Hin frábæra Jennifer Garner heldur ótrauð áfram með heimatilbúnu matreiðsluþættina sína og hér kennir hún áhorfendum hvernig á að gera granóla að hætti hússins.

Ekki er annað hægt en að skemmta sér konunglega yfir þættinum sem er í alla staði frekar frábær eins og stjórnandinn sjálfur er.

Hér gefur að líta uppskriftina og svo er að sjálfsögðu nauðsynlegt að horfa á þáttinn - þó ekki nema bara til að dást að eldhúsinu hennar og atvinnumanna-hrærivélinni.

Granóla Jennifer Garner

2 bollar hafrar
1 bolli kókosflögur - ætla ég að giska á. (e. coconut)
1/2 bolli sólblómafræ
1/4 bolli hörfræ
2 msk smjör
1/2 bolli hunang
1/4 bolli púðursykur
1/2 tsk sjávarsalt
1 tsk vanilludropar

Aðferð:

Hitið ofninn í 150 gráður.
Blandið þurrefnunum saman.
Í pott skal blanda saman smjöri, hunangi, púðursykri, salti og vanillu. Bræðið saman og blandið vel.
Blandið öllum hráefnunum saman.
Setjið smjörpappír í ferkantað form og pakkið blöndunni vel ofan í.
Bakið í ofninum í 10 mínútur.
Takið úr ofninum. Þjappið betur og setjið aftur í ofninn í 10 mínútur.
Nammi namm - látið kólna.
Ef þú elskar súkkulaði skaltu bræða smá súkkulaði saman við matskeið af kókosolíu og sulla létt yfir granolað.
Skerið í bita og njótið.