Við höfum heyrt að grænn litur sé róandi og tengist friðsæld og kyrrð. Því hlýtur það að vera alveg sérlega slakandi og jafnast á við bestu hugleiðslu að dedúa við matseld í fagurgrænu eldhúsi. Til að sýna hversu skemmtilegur og fjölbreyttur græni liturinn getur verið tókum við saman nokkur eldhús þar sem grænn er ríkjandi. Flestir ættu að geta fundið sér grænan lit við hæfi, hvort sem það eru fölir og frískandi myntugrænir tónar eða dökkur og djúpur smaragðsgrænn sem fær fólk til að kikna í hnjánum.