Matur | mbl | 19.5.2018 | 19:31

Ostatjúttarar sem trylla partýið

Níundi áratugurinn öskrar á okkur með sínum rækju- og ananasréttum, arómati og örbylgjuréttum. Við elskum þetta stórkostlega tímabili í íslenskri matarsögu og ætlum á næstunni að birta nokkrar verðlaunauppskriftir sem sumir eiga kannski eftir að hlæja að á meðan aðrir stynja af söknuði og gleði.

Og viti menn... hér í höfuðstöðvum Árvakurs hef ég farið um og borið uppskriftirnar undir samstarfsfólk mitt og flestir muna eftir þessum perlum og sumir gæða sér enn á þeim.

Þessi sjóðheita uppskrift ætti að slá í gegn í hvaða veislu sem er og við segjum bara: Njótið vel!

Ostatjúttarar

30-40 stk.

500 g smjördeig
150 g óðalsostur, rifinn
2-3 msk. Dijon-sinnep
150 g skinka
10-12 ólífur
1 egg
sesamfræ

Aðferð:

Hitið ofninn í 250 gráður. Fletjið smjördegið út, u.þ.b. 5 mm þykkt.
Smyrjið sinnepinu jafnt yfir deigið.
Saxið skinkuna og stráið yfir sinnepið. Saxið ólífurnar og dreifið þeim yfir og að síðustu ostinum.
Rúllið deiginu þétt upp í lengju og skerið hana í 1 sm þykkar sneiðar.
Leggið sneiðarnar á bökunarplötu klædda bökunarpappír.
Látið sárið sem sneri frá hnífnum snúa upp.
Penslið með eggi og stráið sesamfræjum yfir.
Bakið í 10-15 mínútur ofarlega í ofninum.

Heimild: Bestu Uppskriftirnar 1989 – Osta- & smjörsalan.