Hin eina sanna Guðlaug Sigurðardóttir á það til að græta samstarfsfélaga sína hjá Árvakri með eldamennskusögum. Með stakri lagni tókst útsendara Matarvefjarins að ná þessari uppskrift upp úr henni en hún þykir með þeim betri á landinu.
Að sögn Guðlaugar, eða Laugu eins og hún er alla jafna kölluð, skiptir engu hvort notaður er silungur eða lax.
Grafinn silungur/lax Laugu
Ég fann uppskrift á vefnum og gerði hana að minni, eins og flestar aðrar uppskriftir sem ég styðst við.
Grafinn lax
- 1 laxaflak (eða urriði eða silungur en betra er að flökin séu þykk)
- 150 g púðursykur (ég hef minnkað sykurmagnið töluvert miðað við aðrar uppskriftir)
- 250 g gróft salt
- 1 matsk. ferskt, saxað dill, eða nóg til að hylja flakið alveg
- ½ matsk. kórianderfræ, mulin
- ½ matsk. fennelfræ, mulin (eða fersk, fínt söxuð fennelrót)
- 1½-2 cl vodka
Aðferð:
- Þerrið flakið vel, hellið helmingnum af vodka í bakka, leggið flakið ofan á og hellið hinum helmingnum yfir á meðan kryddblandan er undirbúin. Má gjarna liggja lengur í vodkanum og snúa af og til.
- Takið flakið upp úr vodkanum eftir drjúga stund og þerrið.
- Stráið þriðjungi af saltinu á bakka og leggið laxaflakið ofan á það.
- Blandið sykrinum og afganginum af saltinu saman og stráið yfir flakið. Nuddið vel inn í fiskinn. Stráið þurrkryddunum jafnt yfir allt flakið og látið þekja vel.
- Pakkið flakinu þétt t.d. í álpappír og látið standa í a.m.k. 16 tíma. Snúið svo flakinu og látið standa í aðra 16 tíma.
- Á þessum tímapunkti er flakið tilbúið til átu eða í frost og njóta þegar maður er í stuði fyrir það.
- Gott að skera í næfurþunnar sneiðar á meðan örlítið frost er í fiskinum. Berið fram með ferskum dillgreinum, sósu og ristuðu brauði ef vill.
Sósa
- 200 g grísk jógúrt
- 2 matsk. Dijon-sinnep
- 1 matsk. hunang (eða eftir smekk)
- 1 matsk. ferskt saxað dill, eða þurrkað
Það er ágætt að skafa aðeins af kryddblöndunni á fiskinum og setja út í sósuna.
Fiskurinn þykir mikið sælgæti.
mbl.is/Guðlaug Sigurðardóttir