Matur | mbl | 19.7.2018 | 11:03

Ómótstæðilegur humar og risahörpuskel

Í Vestmannaeyjabæ rekur Einar Björn Árnason veitingastaðinn Einsa kalda. Einar man eftir sér sýslandi í eldhúsi sem lítill peyi og leiðin lá snemma í kokkanám á meginlandinu. Hann sneri svo til baka og þegar Landeyjahöfn varð að veruleika sá Einar að grundvöllur væri fyrir að opna flottan veitingastað í miðbænum og hafa hann opinn allan ársins hring. Ásdís Ásgeirsdóttir

Þegar verið er að leita að hinum fullkomna forrétti koma humar og hörpuskel óneitanlega upp í hugan. Hér gefur að líta uppskrift úr smiðju Einsa kalda í Vestmannaeyjum sem ætti engan að svíkja.

Ómótstæðilegur humar og risahörpuskelForréttur fyrir 6

12 humarhalar
12 risahörpudiskar
2 pokar chili-hnetur

Aðferð:

Pillið humarhalana og mænudragið. Maukið chili-hnetur í blandara.
Veltið humrinum upp úr hnetublöndunni og steikið á pönnu upp úr olíu og smjöri til helminga. Kryddið með salti og ljósum pipar.

Marínering fyrir hörpuskel

1 hluti brætt smjör
1 hluti hunang
1 hluti sítrónusafi

Aðferð:

Látið fiskinn liggja í leginum í klukkustund og brúnið fallega á öllum hliðum. Látið hvíla létt í hálfa mínútu.

Steinselju-basilmauk

2 stk. steinseljurót, flysjuð og skorin í kubba

Aðferð:

Sjóðið rótina í rjóma, þar til hún er orðin vel mjúk.
Sigtið hana frá rjómanum og setjið í blandara ásamt smjörklípu, salti og pipar eftir smekk. Geymið.

Takið því næst:

búnt af basiliku
100 g rifinn parmesan
3 hvítlauksgeira
50 g furuhnetur
salt og ljósan pipar
smá sítrónuolíu

Aðferð:

Slítið laufin frá stilkum og setjið í matvinnsluvél ásamt hvítlauk og furuhnetum. Hellið rólega sítrónuolíu saman við, þar til áferðin er passleg.
Blandið þessu því næst saman við steinseljurótina með töfrasprota.

Rjóma-smjörsósa

5 geirar skalottlaukur
3 geirar hvítlaukur
1½ dl hvítvín
1 l rjómi
200 g smjör í kubbum

Aðferð:

Takið skalottlauk og hvítlauk og svitið á pönnu. Bætið hvítvíni saman við og sjóðið niður um helming.
Hellið rjómanum saman við og sjóðið áfram niður.
Þegar sósan er orðin vel þykk er hún tekin af hitanum. Í lokin er svo 200 g af smjöri, sem er skorið í kubba, bætt saman við varlega með sleikju.