Matur | mbl | 10.10.2018 | 14:13 | Uppfært 15:05

Girnilegasti pastarétturinn

Fljótlegur og brjálæðislega góður pastaréttur. mbl.is/Anders Schønnemann

Ef þú elskar pasta og ert til í ljúffengan rétt sem tekur enga stund að græja – þá er þetta uppskrift fyrir þig. Það tekur ekki nema um tíu mínútur að elda þennan girnilega pastarétt sem mun heilla alla upp úr skónum.

Girnilegasti pastarétturinn

300 g brokkolí
½ dl ólífuolía
1 feitur hvítlaukur
¼ rauður chili
300 g ferskt pappardelle eða tagliatelle pasta
25 g möndlur
40 g nýrifinn parmesan

Aðferð:

Skerið brokkolí í litla bita og sjóðið í potti (notið lítið vatn). Skolið því næst upp úr köldu vatni.
Hellið olíu á pönnu og leggið chili og hvítlauk í heilu lagi á pönnuna, og leyfið þessu að malla í 1-2 mínútur á litlum hita þannig að olían fái „bragð“ af hvoru tveggja.
Takið hvítlaukinn og chili af pönnunni og skellið brokkolíinu á pönnuna. Steikið á háum hita í 1-2 mínútur þar til brokkolíið hefur tekið smá lit. Leggið pönnuna til hliðar.
Sjóðið pastað samkvæmt leiðbeiningum og hellið því næst vatninu af. Setjið pastað út á pönnuna og blandið saman við brokkolíið.
Dreifið hökkuðum möndlum og hellingi af parmesan yfir réttinn. Kryddið með salti og pipar og berið strax fram.