Það er ekki á hverjum degi sem miðaldra suðurríkjakona fær draum sinn um að breytast í barbídúkku uppfylltan. En það er einmitt það sem gerðist og nú skulum við segja þessa frétt almennilega.

Mattel hefur sett á markað nýja barbídúkku sem er eftirmynd Pioneer Woman sem er í daglegu tali betur þekkt sem eldhúsgyðjan Ree Drummond.

Fyrir þá sem ekki þekkja sögu Drummond þá er hún fyrrverandi New York-nagli sem varð ástfangin af kúreka og flutti með honum til suðurríkja Bandaríkjanna á búgarðinn hans. Þar hóf hún að unga út börnum og elda mat en í hjáverkum hélt Drummond úti blogginu Pioneer Woman sem varð fljótlega gríðarlega vinsælt. Þar sagði hún sögur af sveitalífinu á skemmtilegan hátt og deildi uppskriftum. Síðan er liðinn meira en áratugur og Drummond er einn þekktasti sjónvarpskokkur Bandaríkjanna. Hún er með þætti á FoodTV Network, hefur gefið út fjölda bóka, hannað eigin eldhúslínu og svo gæti ég lengi talið. Alltaf er Drummond jafn sjarmerandi og þjóðin elskar hana.

Það kemur samt á óvart að Mattel skuli velja miðaldara konu sem næstu barbífyrirmynd en við fögnum þessu einlæglega. Drummond-dúkkan kemur að sjálfsögðu hlaðin glæsilegum aukahlutum og fyrir börnin sem elska fátt heitar en að matbúa er þessi nýjasta barbídúkka hrein himnasending.