Hér gefur að líta ægifagra marengstertu sem lítur hreint allt öðruvísi út en við eigum að venjast en er ekki svo flókin. Það er Hjördís Dögg á mömmur.is sem á heiðurinn að þessari uppskrift en það er alltaf gaman að sjá hvernig hægt er að leika sér með marengsinn.
Marengsterta með eplum og vínberjum
Uppskrift fyrir tvo botna
- 8 stk. eggjahvítur
- 440 g sykur
- 1 tsk. lyftiduft
- gelmatarlitur
Fylling:
- ½ lítri rjómi
- 2 stk. epli – brytjuð smátt
- 10-15 vínber – skorin í fjóra bita
- 3 stk. marssúkkulaði
Aðferð:
- Eggjahvíturnar eru þeyttar, sykrinum blandað saman við og blandan stífþeytt.
- Lyftidufti er síðan blandað varlega saman við ásamt matarlit.
- Til að móta hring er fínt að nota disk ca 26-28 cm og teikna meðfram á bökunarpappír. Marensblandan er sett í sprautupoka og sprautustúturinn 1M notaður. Hægt að byrja að sprauta við línurnar á hringnum eða í miðjunni.
- Marengsblandan er bökuð við 130°C hita í um 1½ klst.
- Rjóminn er þeyttur, eplin skorin í smáa bita ásamt vínberjunum og marssúkkulaðinu. Þessu er öllu blandað varlega saman og sett á milli marensbotnanna.
Hjördís Dögg Grímarsdóttir