Þessi forkunnarfagra kaka var bökuð af Berglindi Hreiðarsdóttur sérstaklega fyrir forsíðu Kökublaðs Matarvefjarins sem kom út á dögunum. Pælingin var að hafa hana virkilega háa sem getur vissulega verið vandamál. Það sem Berglind gerði hinsvegar (og er afar snjallt) var að setja pappaspjald í miðja kökuna þannig að í raun voru þetta tvær kökur settar saman.
Fyrir vikið var líka mjög auðvelt að skera hana. Kakan er 15 sentimetrar í þvermál og litasamsetningin var eiginlega bara alveg út í bláinn og kom vel út.
Punkturinn yfir i-ið var síðan lógó Matarvefsins sem Hlutprent skar út fyrir okkur.
Kakan er djöflakaka frá Betty Crocker – bragðbætt að sjálfsögðu með Royal súkkulaðibúðingi. Á milli er kaffismjörkrem og kakan var algjörlega dásamleg á bragðið.