Hver elskar ekki kvöldmat sem er í senn fremur auðveldur og krakkarnir elska? Þetta er það sem kallast á fjölskyldumáli alslemma enda er þessi réttur sérlega frábær og ekki að ástæðulausu.
Það er María Gomez á Paz.is sem á heiðurinn að uppskriftinni en sjálf segir hún að krakkarnir hennar elski þennan rétt.
Kjúklinganaggar sem krakkarnir elska
- 3 kjúklingabringur
- 3 egg
- 1 bolli fínt rifinn parmesan-ostur (rífið sjálf með smáu rifjárni ekki kaupa þennan í dollunni)
- 3/4 bolli Panko-brauðrasp (ekki rugla saman við Paxo). Panko er japanskt brauðrasp. Ekki nota annað rasp í staðinn því það kemur ekki eins út
- Hveiti
- salt
- pipar
Aðferð
- Skerið bringurnar í bita á stærð við hefðbundna nagga
- Setjið plastfilmu yfir bitana og lemjið á þá með pönnu eitt högg svo þeir fletjist smá út (ekki of mikið)
- Setjið egg í skál og saltið og piprið ögn
- Setjið hveiti í aðra skál
- Og svo Panko og Parmesan í þriðju skálina (blandið því vel saman)
- Setjið hvern kjúklingabita fyrst í hveiti, svo egg og síðast í parmesan-pankoið
- Passið að hrista umframhveiti og umframegg vel af áður en dýft er í pankoið
- Raðið á ofnplötu með bökunarpappír
- Bakist svo á 210-220 C° blæstri í 20 mínútur eða þar til gyllinbrúnir
- Berist fram með pizzasósu til að dýfa í, namm ómótstæðilega gott.