Við á Matarvefnum höfum nú oft dásamað matreiðslunámskeiðin á Salt. Þau eru líka afbragðsleið til að auka líkurnar á að börnin flytji úr foreldrahúsum fyrir fimmtugt.

Upplýsingar á Salt.is 

Vínsmökkun sem tryllir skilningavitin 

Skelfiskmarkaðurinn er nýtt veitingahús í eigu Hrefnu Rósu Sætran og félaga. Þar er hægt að kaupa gjafabréf á 10 rétta smakkseðil sem paraður er með úrvals vínum. Vínþjónn staðarins kennir fólki allt um lekkerheitin þess að drekka laglegt léttvín svo fólk getur slegið um sig í næsta matarboði. 
Gjafabréf fást á Skelfiskmarkaðnum eða á tix.is

Á veitingahúsinu The Coocoo's Nest er hægt að kaupa fjölda sniðugra gjafabréf á. Brunch-inn þar hefur verið sérlega vinsæll sem og Taco Tuesday eða mexíkóskur þriðjudagur þar sem boðið er upp á alvöru Taco í nýbökuðum mjúkum Taco skeljum. Hægt er að kaupa sérstök gjafabréf á Taco Tuesday. Fullkomin ávísun á stefnumót. 

Kaffi og kruðerí 
Það elska flest allir kaffi. Gott kaffi er ekki gefins og því er gaman að kaupa hágæðakaffi og kruðerí með til að gera jóladagsmorgun einstaklega ljúfan. Það má jafnvel kaupa kassa af dásamlegum makkarónukökum með.
Hægt er að panta kaffikörfur á kaffitar.is og makkarónukassinn fallegi fæst í Kruðerí. 

Brauð og Co og eflaust fleiri bakarí selja gjafabréf sem gott er að grípa í, í letikasti milli jóla og nýárs og njóta þess að kjammsa á nýbökuðu og lesa góða bók. 

Mathallarrölt 
Mathallirnar á Hlemmi og Granda hafa hlotið góðar viðtökur en þar er að finna fjölda girnilegra veitingastaða. Nú er hægt að kaupa gjafabréf sem gilda á öllum stöðunum í Mathöllinni Granda og Hlemmi. Skemmtileg upplifun fyrir forvitna sælkera og flestir geta fundið eitthvað við sitt hæfi.